IZINKONDLO
Ngidedele Buvaka ungivovile ngiwuvoco Ngithithibele nginedumbe namalimi Le nto yangiqhoqhobala yangiququda Ngidedele ngebhe ngizidele. Ngiyakujeqeza sengathi ngiyakuqabuka Ngikugqolozele ngingaqedi, Ngikucinga ngingecwayize Ngikujamele ngijuluke, Ngidedele ngebhe ngizidele. Bagabe ngegolide, ngigabe ngawe Lezo mbali ziyabuna ziyavuthuluka Ubumuhle; usemuhle; uyolokhu umuhle Gudluka ngebhe ngizidele. Ngaphakathi kuyaphithizela Uthando lwenza into yamehlo Ukwethembeka kusik’ ukhasi Intokozo ikhipha unyawo Nenhlonipho ishayela phezulu. Ayacikoza amaciko nangamacilongo Imicu ivusa usinga kusale umunyu Kufika inkumbulo ilanywe yizinyembezi Yebo; lamaciko awachazi le nto engichazayo; Mana ngiphahluke sengehlulekile. Ingidla ngedwa le nto yami nawe Sengiququdwa iminjunju ngijule Ngawengqondo kade ngakuqomisa Nhliziyo uyakhuluma mlomo uthule Ngidedele ngebhe ngizidele. Angisale sengizinqum’ amakhanda Abakhongi, yikhetho nomthimba Izingwevu ziyavuma nengwebu Ivumile, Nawe vuma siye kwanhliziyo ngise. Gudluka ngebhe sihlukane ekufeni. Amazwi kaMama - Mduduzi Banda Nginik’ usiba ngibhale ngomama, Ongibek’ eshashalazini ngingebani, Kwaklabalas’ izitha ngiqhakaza, Emphakathini wabahlwempu nabadl’ imbuya ngothi.
Izandla zakho zingifukamele njengesikhukhukazi, Ngazibona ngizimuka ngenhlakanipho, Esizindeni sabahaqwe ubuwula. Sondela ngikubonge mama. Uyithwale kunzima intaba yesisu,
Waqoka ukungayihushul’ emehlwen’ ezwe. Impel’ ubukhona bakho bungakhile, Namuhla ngiyindoda yamadoda. - Samkelo Makhaye