Luqhathe iPSL neSafa uxhaso lonompempe
IBHEKENE ngeziqu zamehlo phakathi kweNational Soccer League (NSL) nenhlangano eyengamele ibhola eNingizimu Afrika, iSouth African Football Association (Safa) ngoxhaso lonompempe okuvela ukuthi seluqhathe iPremier Soccer League (PSL) nabaxhasi bayo.
Ngesonto eledlule iSafa imemezele uxhaso lukaR50 million oluvela enkampanini yomshwalense i-OUTsurance oluzobhekelela ukuthuthukiswa konompempe nokusiza asebevele bekhona ngokwenza umsebenzi kalula.
Kungokokuqala emlandweni webhola laseMzansi ukuthi onompempe bathole ukuxhaswa. Nokho lokhu akujabulisanga zonke izinhlangothi ebholeni lakuleli njengoba iPSL isiveze ukuthi lokhu kuphambene nemithetho yenhlangano eyengamele ibhola emhlabeni iFifa kuphinde kushayisane nesivumelwano abanaso nabaxhasi okukhona kubona iSuperSport ne-Absa abafaka imali eshisiwe kwiligi. Ngokwemithetho yeFifa kunemibandela ngokufanele kubonakale emfaniswaneni wonompempe okuhlanganisa ukumaketha izinkampani noma imikhiqizo ethize. Onompempe sebevele baqalile ukubonakala nemifaniswano ebhalwe i-OUTsurance.
Esithangamini nabezindaba izolo e-Emperors Palace, eGauteng, usihlalo wePSL u-Irvin Khoza uthe bazithola sekufanele baphendule imibuzo kubaxhasi ngoxhaso lonompempe. Bekubizwe umhlangano ophuthumayo wesigungu iBoard of Governors eyakhiwe ngosihlalo bamaqembu awu-32 okukhona kuwona awu-16 adlala kwi-Absa Premiership nayisibalo esifanayo agijima kwiNational First Division (NFD).
“I-OUTsurance yafika kithina uiuna ukuxhasa kodwa sayichitha ngoba sazi ukuthi lokhu kuphambene nomthetho. Kodwa ijike lapho yahamba ngemuva yayovumelana neSafa engazange isithinte ngaphambi kokumemezela uxhaso. Umthetho u-15.3 weFIFA uyakucacisa ukuthi ukukhangisa ngemifaniswano yonompempe akuvunyelwe nokufanele kubonakale ezintweni abazigqokayo. Asisukunyiswa okushiwo yiFifa kuphela kodwa sinabaxhasi esisebenza nabo abasibuzayo ukuthi kwenzekani. Sikhuluma nabameli bethu ukuthola umhlahlandlela,” kusho uKhoza.
“Ngesikhathi i-OUTsurance ifika kithina uMenser (Peter) wabachazela ukuthi iPSL iyasichitha isicelo soxhaso emidlalweni ye-Absa Premiership ngoba lokhu kuzoshayisana noxhaso olukhona ne-Absa. Baphinda bacela ukungena emidlalwaneni yemikhumulajezi kodwa bachazelwa ukuthi kuzoshayisana nengxenye yemishwalense yePSL. Emuva kwezinyanga eziyisikhombisa sithola isimemezelo sokuthi i-OUTsurance ixhasa onempempe okuyinto ephambene.
“Sizamile ukuhlangana neSafa emuva kwalesi simemezelo kodwa sihlulekile. Besicabanga ukuthi lokhu kungaxazululwa ngaphandle kokuthi kuze kuphumele emphakathini. Uma kukhona abafika no-R250 million bese kuba khona abaqhamuka no-R10 million, sizothini manje kubaxhasi? Ngoba manje kufanele sibanike izimpendulo. Abaxhasi bathi lokhu osidayisela khona amalungelo ehlelwa yizinga.”
Okhumela iSafa, uDominic Chimavhi, uthe: “Siyibhalele iFifa ngalokhu, awukho umthetho esiwuphulile. Asikwazi ukucela imvume kwiPSL, yithina esiphethe ibhola. Lokhu kufana nokucela imvume enganeni yakho. Inhloso yethu wukuthuthukisa ibhola, hhayi ukwenza inzuzo. Kubi ukuthi sekunomdonsiswano. Bangaya enkantolo uma bethanda. Uxhaso esilutholayo olokuthuthukisa ibhola hhayi amaqembu awu-32 kuphela.”
Khonamanjalo iBanyanya Banyana idlulele kowamanqamu weCosafa Cup ngemuva kokushaya i-Uganda ngo 2-0 izolo ntambama. Izobhekana neCameroon, eshaye iZambia ngo 1-0, kusasa ntambama.