UMncwango ugxekwa kolokufa kwesiguli
LUYASHUBA udaba lokushona kwesiguli emtholampilo eMzinto, njengoba kuthiwa unesi osolwa ngokungasinaki usenxuswe ukuba asule emsebenzini.
Isolezwe lithole ngenhlangano iNurses Forum ukuthi ucelwe ngabaphathi bakhe ukuthi asule unesi wasePhungashe Clinic osolwa ngokuba budedengu okuholele ekushoneni kukaNksz Thobile Phungula (26). Lesi sigameko esenzeke ngoSepthemba 6 sithukuthelise umndeni kamufi, osola ubudedengu ngaso. Kuthiwa umufi wayelethwe emtholampilo ngo-2 ntambama, washona ngabo 10 ebusuku elinde i-ambulensi.
UMnuz Bhekithemba Gumbi onguSihlalo weNurses Forum, uthe ngeke bavume ukuthi asule emsebenzini lo nesi ngoba akanacala.
“Isiguli sasingaxinekile kodwa ukugula bekuhlasela iziqubu. Unesi wakwenza okwakufanele, kwashaya isikhathi sokuvala umtholampilo ntambama, wagoduka. Wabuyela emtholampilo ukuzobheka isiguli, waphinde washayela ucingo i-ambulensi. Lezi zindaba ezinjena ziqhatha onesi nomphakathi ekubeni kumele kugxekwe ukuphuza kokufika kwe-ambulensi,” echaza.
Uthe sebezwile ukuthi uMnyango wezeMpilo uyaphenya, yingakho nabaphathi bamanesi bethe akasule ngoba udaba lwakhe lubucayi. UGumbi uthe bazomeseka unesi futhi bazoluhlonipha uphenyo. Ugxeke uMnuz Zwakele Mncwango onguMholi weDA esifundazweni obekhona emngcwabeni kaNksz Phungula, ogxeke onesi ngesenzo sabo.
“Ngeke siphike ukuthi kunezinkinga emnyangweni ngoba onesi bayashoda. Abaholi abanjengoMncwango akumele bagxeke abasebenzi kodwa kumele baqinise ekutheni kulungiswe isimo emnyangweni, bezwe nezinkinga zabasebenzi,” kusho uGumbi.
UNobhala wenyunyana yonesi iDenosa eKZN uMnuz Mandla Shabangu, uthe sebekhulumile nonesi. Uthe ngeke baqophisane nosopolitiki kodwa bazolinda umnyango, bayomela unesi.
Ezinkundleni zokuxhumana onesi abaningi bagxeke uMncwango ngokugxambukela, basabisa nangokumashela emahhovisi eDA.
UMncwango uthe uzwile ngokugxekwa kwakhe kodwa usamile ekutheni kumele baphenywe abangawenzi kahle umsebenzi ekubeni bephethe impilo yabantu. Uthe ulwethulile udaba kuNgqongqoshe uDkt Sbongiseni Dhlomo nasesiShayamthetho.
UNksz Ncumisa Mafunda okhulumela umnyango uthe sebeqalile ukucubungula lolu daba futhi bazothatha izinyathelo ezifanele.
Uyise kamufi uMnuz Mthethiswa Phungula uthe bathole ucingo kwabomnyango bebatshela ukuthi bayaphenya. Uthe kuke kwafika kabili abaphathi basemtholampilo bezobasayinisa kodwa wanqaba ngoba usola ukuthi bafuna ukushintsha isitatimende.
UPhungula uthe umufi owayenenkinga yokuphefumula, washona emgade nonogada, onesi bengamnakile bekwelinye igumbi.