UBenni uzobe ekhona ebhentshini eMabhida
UMQEQESHI weCape Town City, uBenni McCarthy, uzobe ekhona ebhentshini uma iqembu lakhe selibhekene neSuperSport United kowamanqamu weMTN 8 eThekwini ngempelasonto.
Umdlalo useMoses Mabhida Stadium ngoMgqibelo ngo-7 ebusuku.
Usihlalo weThe Citizens, uJohn Comitis, uqinisekisile ukuthi zonke izinhlelo zeqembu zomdlalo zihamba kahle njengoba umqeqeshi eyingxenye yeqembu.
Ngesonto eledlule, uMcCarthy, uphuthwe umdlalo weCity idlala ne-Orlando Pirates ngemuva kokuthi inkosikazi yakhe ingeniswe esibhedlela yayohlinzwa kade inenkinga yephaphu.
Kulo mdlalo iCity ibuye kade ilandela ngemuva ngo 2-0, umdlalo wagcina uphele ngo 2-2.
“Umqeqeshi ubengekho izinsuku ezimbili nje kuphela. Usebuyile iqembu liyaziqeqesha njengokujwayelekile. Sonke siyabonga ukuthi unkosikazi usengcono njengoba esephumile egunjini labagula kakhulu,” kusho uComitis.
Lo mdlalo wamanqamu uyimpinda yowangesizini edlule lapho iCity yakhala ngaphansi ngo 4-2 kumaphethani ngemuva kokuthi umdlalo uphele ngo 1-1.
Lokhu kwasho ukuphunyukwa kukaMcCarthy isicoco sakhe sokuqala njengomqeqeshi.
Kulokhu noKaitano Tembo ozobe ehlezi ebhentshini laMatsatsantsa a Pitori ubheke eyakhe indebe yokuzibula njengomqeqeshi. “Sethemba ukuthi umbani ngeke ushaye kabili endaweni eyodwa. Yebo siyasifuna isicoco sethu sesibili kumasizini amathathu kodwa konke kuncike ekusebenzeni kanzima. Kuyimanje akukho okunye esikucabangayo ngaphandle komdlalo,” kusho uComitis.
ICity ikhiphe amabhasi kubalandeli bayo abazimisele ngokuzobuka umdlalo.
“Kuyimanje sesigcwalise amabhasi amathathu,” kusho uComitis.
Amathikithi omdlalo atholakala eTicketPro ngo-R40 abadala no-R15 ezingane ezineminyaka engaphansi kweminyaka ewu-12.
Ngemuva kwalo mdlalo iCity izobhekana neBidvest Wits koweAbsa Premiership ngoLwesibili oluzayo.
Kwiligi iqembu likaMcCarthy lisanqobe kanye emidlalweni eyisithupha. Lidlale emithathu ngokulingana lashaywa kwemibili, nokulibeka endaweni ka-11 kwilog ngamaphuzu ayisithupha.