Ingwazi negama elisha likamaskandi
INGWAZI ye-world music uMbuso Khoza isiphakamise ukuthi kuqhanyukwe negama lesintu elizosho umculo kamaskandi.
UKhoza, obuye abe ngungoti wolimi lwesiZulu, uthe kufanele kuhlangane izinjulabuchopho ezingamaZulu ziqhamuke negama elizoyihlaba esikhonkosini ngoba elithi maskandi liwumfakela.
“Yigama elisuselwe olimini lwabacindezeli, isiBhunu. Ngesikhathi abantu bakithi sebeshiya amakhaya beyosebenza emafemini. Kukhona indoda eyafike yathola ukuthi iBhunu lidlala isigingci. Yathi uma ibuza le ndoda ukuthi yini lena edlalwa yiBhunu, lathi Ek Speel Musik (Ngidlala umculo)... Ek Is Musikant (Ngiwumculi). Le ndoda yabe seyizibiza ngomaskandi.”
UKhoza uthe yize isigingci kungeyona insimbi yomculo edabuka kuleli kodwa umculo kamaskandi owendabuko.
“Kubuhlungu khona ukuthi ezinye izinhlobo zomculo zangaphandle zinamagama ezibizwa ngawo kodwa owethu usabizwa ngamagama abacindezeli. Njengoba uhulumeni ekwazi ukuguqula amagama emigwaqo, negama lalo mculo kufanele lishintshwe.”
Leli khwelo elishaywa nguKhoza lake lashaywa nangomunye umculi kamaskandi wakwaNongoma, uLungelo Vilane odume ngelikaNgelo V, yena waze waphakamisa ukuthi lo mculo ubizwe ngeNgqayizivele. Nakuba kukhona abahambisana naye kodwa abanye abalandeli bamgxeka.
Uthe umculo kamaskandi wasuselwa emculweni wamahubo.
“Amahubo ayehlatshelelwa kusukela kusabusa iNkosi uShaka nangezikhathi zeNkosi uCetshwayo, kwathi uma sekufika ama-missionaries awuguqula umculo wethu. Nasezingomeni zezingqalabutho zikamaskandi uPhuzushukela noMgqashiyo Ndlovu bewuzwa ukuthi kukhona amahubo.”
UKhoza ubuye waphonsela inselelo izilomo zalo mculo okubalwa kuzo oKhuzani neGcokama Elisha ukuba bakusukumele ukuqanjwa kabusha komculo kamaskandi.