Owayeyisikhulu samaphoyisa ezinsolweni zokudlwengula
ISIKHULU sesiteshi samaphoyisa esesathatha umhlalaphansi singene ehlazweni siboshwa ngozakwabo esasisebenza nabo, ngezinsolo zokudlwengula umzukulu waso.
Lesi sikhulu (70) esasiphethe isiteshi saseMahlabathini kuthiwa besilokhu sizikhalela emuva kokufika kweveni yasesiteshini sasoLundi, bezosibopha ngecala lokudlwengula umzukulu oneminyaka engu-18.
Ngokuthola kweSolezwe umgilwa uyisihlobo sikankosikazi kamsolwa, ubehlala nabo emzini wabo.
Isolezwe lithole ngomthombo osondelene naleli cala ukuthi unkosikazi ubehambile ngesikhathi kwenzeka lesi sigameko.
Kuthe esebuya ekhaya wathola umbiko wokuthi lo wesifazane ona-18 udlwengulwe wumyeni wakhe.
Lo wesifazane ongumgilwa nonkosikazi kamsolwa babe sebevula icala lokudlwengula.
Umsolwa uboshwe ngeSonto esemzini wakhe eMbangayiya oLundi. Uvele okokuqala enkantolo yasoLundi ngoLwesibili waphinde wavela izolo.
Okhulumela amaphoyisa KwaZulu-Natal uCaptain Nqobile Gwala uthe uphenyo ngaleli cala lusaqhubeka.
“Kuvulwe icala lokudlwengula esiteshini sasoLundi kulandela izinsolo zokudlwengulwa kowesifazane oneminyaka engu-18, ngumkhulu wakhe oneminyaka engu-70.
Umsolwa uvelile namhlanje enkantolo yasoLundi,” kusho uCaptain Gwala.
Icala lihlehliselwe u-Okthoba 2 nonyaka ukuze umsolwa afake isicelo sebheyili.
Okwamanje usagqunywe esitokisini.
Omunye umthombo weSolezwe ocele ukungadalulwa uthe umndeni uhlukene phakathi ngaleli cala.
“Kukhona amanye amalungu omndeni abefuna ukuba umsolwa akhishwe esitokisini ngoba ethi liwumdlalo leli cala kwazise basola ukuthi uboshelwe amanqina enyathi umsolwa.
Abanye bomndeni bafuna ukuba icala liqulwe kube nobulungiswa. Ukuboshwa kukamsolwa kumfake kwelikhulu ihlazo njengoba ubengumuntu odumile obesebenza nabo laba bantu abambophile,“kusho umthombo.
Omunye umthombo nawo osondelene necala uthe yize umgilwa ekhulelwe enezinyanga ezinhlanu kodwa ingane ngeyesoka lakhe.
“Impela lo wesifazane uzithwelwe kodwa ingane inoyise ongeyena umsolwa. Umsolwa umdlwengule ezithwele,” kusho umthombo ongashayi eceleni.
Umsolwa kuthiwa kunesikhathi athatha umhlalaphansi emsebenzini wokuba iphoyisa.
Kwenzeka lokhu nje izolo kugwetshwe inkakha kwezokulingisa yaphesheya, uBilly Cosby ngecala lokudlwengula abesifazane abahlukene, ube esegwetshwa iminyaka engu-10, emithathu yayo kuzomele eyibhadle ejele ngaphambi kokuthi acele ushwele.