Linovalo ikhansela okuhlaselwe umuzi walo yiqulu
LIHLALELE ovalweni ikhansela le-ANC e-ward 59, eVerulam ngemuva kwesigameko lapho iqulu labantu okusolwa ukuthi ngamavolontiya enhlangano egasele emzini walo afike achitha udoti egcekeni, aphinde ashisa namathayi esangweni ngoLwesibili ebusuku.
Ngokusho kwekhansela uMnuz Linda Majola, laba bantu bebehlose ukuzoshisa umuzi walo kodwa baphazanyiswa ukubuya kukagesi. Elandisa ngalesi sigameko uMajola uthe: “Ngithole ukuthi laba bantu bafike lapho kuqhubeka khona uhlelo lokufakwa kocingo esiqiwini bafike bakhuluma nomuntu obheke umsebenzi bamtshela ukuthi bafuna ukuqashwa, wabatshela ukuthi lokho ngeke kuze kwenzeke ngoba abantu abaqashiwe abashintshwa kuze kuphele uhlelo, bathe ayikho into abazoyikhuluma nalo muntu ogade umsebeni, bathi bafuna mina ukuthi ngibonane nabo engakashayi u-5 ntambama. Bathe uma lokho kungenzeki bazoshisa umuzi wami,” kusho uMajola.
Uthe ucabanga ukuthi laba bantu baphazanyiswe ukubuya kukagesi obungekho endaweni ukuthi bangakwazi ukushisa umuzi wakhe.
“Kuthiwa kuthe kungabuya ugesi babaleka ngoba bebona sekukhanya,” kusho uMajola.
Uthe isizathu esenza ukuba basabe manje ukuthi akusikho okokuqala ukuthi basatshiswe ngokuthi bazoshiselwa umuzi njengoba kuke kwenzeka nangoFebhruwari ekuqaleni kwalo nyaka.
UMajola uthe lesi sigameko usibikile emaphoyiseni aseVerulam.
Okhulumela amaphoyisa KwaZuluNatali uLt Colonel Thulani Zwane uthe amaphoyisa ayaphenya ngalesi sigameko.
Elinye lamavolontiya e-ANC asebenza ohlelweni lokufakwa kocingo esiqiniwini elicele ukuthi lingadalulwa likuqinisekisile ukuthi abantu abasolwa ngokuhlasela kwakhansela baqale kubona bezofuna umsebenzi ngenkani.
“La maqabane esiwaziyo afike lapha athi afuna umsebenzi, atshelwa ukuthi awukho abe esethi afuna ikhansela. Athe uma lingabonani nawo engakashayi u-5 ntambama azoshisa umuzi walo,” kusho leli volontiya.
USihlalo we-ANC e-ward 59, uMnuz Bongumusa Nciki uthe nakuba enganaso isiqiniseko ngesigameko kodwa uzwile ngaso.
“Ngizamile ukulithinta ikhansela kodwa ngangalithola, nami ngisazwe ngamahlebezi okwenzekile,” kusho uNciki.
Uphikile ukuthi abantu abenze lesi sigameko ngamavolontiiya e-ANC.
“Angikholwa ukuthi kukhona amavolontiya enhlangano engenza leyo nto,” kusho uNciki.