Bajika nelanga ngenxa yezitimela
YINQWABA yabahlala emahostela abalahlekelwe yimisebenzi ngenxa yezitimela ezibafikisa sekudlule isikhathi emsebenzini.
UMnuz Mthembeni Thusi woBunye bamaHostela uthe ukufika sekudlule isikhathi emsebenzini kungezinye zezinto ezimkhipha ngesango umsebenzi uma esekwenza njalo.
Uthe sekuneminyaka izitimela zinenkinga yokufika sekudlule isikhathi okuholela ekutheni abantu abangenayo imali yokugibela amatekisi abathembele kuzo baphelelwe amatoho.
“Inqwaba yabahlala emahostela abangasasebenzi abathi baxoshwa ngoba befika sekudlule isikhathi okubangelwa izitimela ezifika sekudlule isikhathi. Uma kunomsebenzi ofika ngemuva kwesikhathi njalo kuphazamiseka umkhiqizo, okugcina kuholele ekutheni abaqashi babone ukuthi kungcono bamxoshe. Emahostela sigibela sona isitimela ngoba siseduze futhi sishibhile, kodwa kuyakhathaza ukuthi isitimela sisilele emuva ngehora, sibe sisazohamba kusho ukuthi wena mgibeli uzofika nini?,” Uqhube wathi iPassenger Rail Agency of South Africa (PRASA) kumele ilubhekisise udaba lwezitimela ezifika sekuhambe isikhathi ngoba abasebenzi kungenye yezinto eziholela ekutheni basuse uthuthuva, zigcine zicekelwe phansi. “Siyakugxeka ukucekelwe phansi kwezitimela kodwa uPRASA nawo awuzinuke amakhwapha ngodaba lokufika sekudlule isikhathi kuyasixoshisa. Uma lolu daba ungalulungisi kunamathuba amaningi okuthi isigameko esifana nesangoLwesihlanu siphinde senzeke,” kusho yena.
Usho kanjena ukuhamba kwezitimela kusamisiwe KwaZulu-Natal kulandela ukushiswa kwesiteshi sesitimela ngoLwesihlanu.
Kuthiwa lesi siteshi sathungelwa ngomlilo ngabagibeli ababethukutheliswe ukuthi isitimela sifike sekuhambe isikhathi.
UThusi usho kanjena nje ziyaqhubeka izigcawu zokubonisana ngezokuphepha ezihlanganisa uMnyango wezokuThutha KwaZuluNatal, uPRASA nabagibela isitimela. Isigcawu sayizolo besiseMaweleni. Kulezi zigcawu kudingidwa ngokuthi ngabe uma zibuya izitimela, abasebenzi bakwaPRASA, ingqalasizinda nabagibeli baphephile yini.
UThusi uthe okunye okuyinkinga ukuthi izitimela sezishiyana ngehora okusho ukuthi uma kukhona esingafikanga kuzophela amahora amabili singekho isitimela esifikayo.
Usho kanjena nje uMnuz Zama Nomnganga okhulumela iPRASA KwaZulu-Natal, uthe ingqalasizinda nezitimela ezithwala umphakathi sekukudala, okunomthelela wokuthi zisilele emuva ngesikhathi.
“Kwesinye isikhathi kuye kudingeke ukuthi zidluliswe ngasinye ngasinye ngoba ingqalasizinda yethu ayikwazi ukulawula izitimela ngobuchwepheshe ngenxa yobudala bazo,” kusho yena.