Zingase zishushiswe izelamani zakwaGupta
KULOKOZA inhlansi yethemba yokuthi izelamani zakwaGupta zingase zishushiswe eNingizimu Afrika emuva kokuthi isayine isivumelwano sokusebenzisana kwezomthetho ne-United Arab Emirates (UAE).
Izolo iSABC ibike ukuthi iNingizimu Afrika isayine isivumelwano sokusebenzisana kwezomthetho esizogunyaza la mazwe ukuthi alande ababalekela ukushushiswa kuwo uma bebhacile.
“NgoSepthemba 25 uNgqongqoshe wezoBulungiswa nokuHlunyeleliswa kweziMilo, u-Adv Michael Masutha, nozakwabo wase-UAE, uSultan Saeed Al Badi, basayine isivumelwano sokusebenzisana kwezomthetho e-Abu Dhabi, e-UAE,” kusho isitatimendeni soMnyango wezoBulungiswa nokuHlunyeleliswa kwezimilo.
Izingxoxo zokuthi amazwe asebenzisane kwezomthetho zaqala ngoFebhuwari 2010 kodwa isivumelwano size sasayinwa kulo nyaka.
“Isivumelwano sizoqinisekisa ukuthi ababalekela ukushushiswa bayabuyiswa ukuze babhekane namacala emazweni abo,”
Ezinkundleni zokuxhumana abantu bathe banethemba lokuthi ababesebenzisa umbuso ukufeza izinhloso zabo bazoshushiswa.
UNksz Nomsa Mdluli @Nomsa_ Md uthe iNingizimu Afrika isayine isivumelwano sokusebenzisana ne-UAE futhi uyathemba ukuthi ababesebenzisa umbuso bazobuya ukuze bashushiswe.
USimaxis ubuze ukuthi: “Ngabe ukusayinwa kwalesi sivumelwano kusho ukuthi izelamani zakwaGupta zizolandwa lapho zibhace khona ukuze zishushiswe?”