Izakhamizi zixoshe ezibasola ngokugaya ivoti emhlanganweni
ABANTU baseBenteheuwel, eCape Town batshele uNgqongqoshe wamaPhoyisa uMnuz Bheki Cele ukuthi ngeke bavume ukuthi izinkinga zabo zisetshenziselwe ukugaya ivoti.
Izolo uCele ubehlangene nabantu baseBenteheuwel akade bebhikisha ngoLwesibili bekhala ngokuhlaliswa lubhojozi yizigebengu ezidubulana noma kunini.
UCele ubehambisana nabaholi bakaMasipala waseCape Town okubalwa kubo obhekelele ezokuphepha uMnuz JP Smith nekhansela lendawo uMnuz Angus McKenzie.
Abantu bacele ukuthi uSmith noMcKenzie bahambe kulo mhlangano bekhala ngokuthi bazogaya ivoti ngoba kudala bekhala kubo kodwa bengezi nesixazululo.
USmith noMcKenzie baqale banqaba ukuhamba njengoba bebethi banelungelo lokuza kulo mhlangano.
UCele uye wabacela oSmith noMcKenzie ukuthi bahambe ukuze umhlangano uzoqhubeka.
Bagcine bephumile abantu batshela uCele ukuthi bakhathazekile ngezokuphepha kule ndawo ngoba abasakwazi ngisho ukuhamba ngokukhululeka ngenxa yezinhlamvu ezindiza imini nobusuku.
Abanye bakhale ngokuthi udlame oluqhubekayo ludlula lolo olwalukhona ngesikhathi sobandlululo.
Bathe bahlale benovalo uma izingane zabo zisezikoleni ngenxa yokuthi kungenzeka zigcine zingabuyanga zidutshulwe yizinhlamvu ezindiza uma izigebengu zidubulana.
NgoLwesibili kuboshwe abantu abayisishiyagalombili ababhekene namacala okudala udlame emphakathi.