Kunzima kubasebenzi abaqhuba iziguli eNgwelezane abangaholile
BATHWELE kanzima abasebenzi bezempilo abaqhuba iziguli asebengenela enyangeni yesibili bengaholile esibhedlela saseNgwelezane.
Kuthiwa laba basebenzi abasebenza ngaphansi kwenkampani ezimele eqashwe nguMnyango wezeMpilo bagcine ngoJulayi nonyaka ukuhola emuva kokuthi befakwe phansi kwenkampani entsha, iCachat Portering Services. Laba basebenzi benza imisebenzi eyahlukene okubalwa kuyo ukuqhuba iziguli, ukuhambisa amagazi, ukuthatha iziguli esezishonile bezisusa emawodini beziyisa emakhazeni esibhedlela, ukuhambisa izingubo okulalwa ngazo, bahambisa iziguli uma zidinga ukuyoshaya izithombe nokunye.
Lo msebenzi wonke bawenza bese behola imali enguR1 600 ngenyanga, abagcine ukuyihola ngoJulayi.
Omunye wabasebenzi ocele ukuthi igama lakhe lingadalulwa ngoba esabela ukuhlukumezeka emsebenzini uveze ukuthi sebephoqeleka ukuthi bacele ukudla okudliwa yiziguli ngoba bengenakho emuva. Uthe akufanele engabe badla ukudla okudliwa yiziguli kodwa isimo esesibaphoqa.
“Isimo sibi kakhulu kithina njengoba singaholile. Iningi lethu liqashile lapho esihlala khona futhi siyondla ngemali esiyiholayo. Kunzima njengoba singaholile ngoba asikwazi kwenza lutho. Asiyitholi nencazelo ecacile uma sibuza ukuthi kubambe kuphi ukuze sihole,” kusho umsebenzi.
Omunye umsebenzi naye ocele ukuthi igama lakhe ligodlwe uthe bebezitshela ukuthi lesi simo ngesesikhashana esincane nokuthi siyalungiswa kodwa manje sebephelelwa yithemba njengoba sekungenela enyangeni yesibili bengaholile.
Abasebenzi bakhale ngokuthi abanayo inyunyana njengoba bengavumelekile ukuthi babe ngaphansi kwenyunyana, ngenxa yalokhu abanabo abantu abangabamela kule nkinga ababhekene nayo.
Umphathi wenkampani eqashe laba basebenzi, uMnuz Sibongakonke Shongwe uthe uyazi ngokungakhokhelwa kwabasebenzi.
Uthe ubachazelile ukuthi ubengakakhokhelwa nguMnyango wezeMpilo nokuthi uthenjiswe ukuthi uzokhokhelwa maduzane. Uthe kulindeleke ukuthi abasebenzi bahole ekupheleni kwale nyanga.
Unxuse abasebenzi ukuthi bambekezelele aze ahole.
Okhulumela uMnyango wezeMpilo eKZN, uNksz Ncumisa Mafunda uthe: “UMnyango uyaye uqashe izinkampani ezizimele ukuba zenze imisebenzi ethile, okubalwa kuwo owokuhlanza izikhungo zezempilo. Lezi zinkampani ziziqashela zona abasebenzi futhi kuwumsebenzi wazo ukuba zibaholele ngesikhathi esifanele.
“Umnyango ungakuqinisekisa ukuthi uyikhokhelile inkampani ngesikhathi esifanele. Futhi ngaphambi kokuthintwa yiphephandaba, umnyango ubungazi ngodaba olubandakanya abasebenzi nemibiko yokungaholi kwabo.
“Uma inkampani idinga ukulekelelwa ngezinto ezingayisiza igweme lokhu okuthiwa kwenzekile, izandla zomnyango zivulelekile.”