Udayise izinkomo esungula iqembu
UTHWELE kanzima umholi weqembu lepolitiki elihlubuke kuNFP, okudingeke adayise izinkomo emakhaya KwaNongoma ukuze akwazi ukuliqala.
UMnuz Bheki Gumbi weNational People’s Front (NPF), ukusho lokhu ebalisa ngezinsolo ezenziwa abanye abaholi beNFP, abathi iqembu lakhe liqalwe ngemali yenhlangano yabo.
“Ngicela ukucacisa ukuthi iNPF ayiqalwanga ngezithukuthuku zobugebengu kodwa kube yimi engidayise izinkomo emakhaya ukuze sikwazi ukuqala iqembu lethu. Ngikhuluma njengoba ebhange kulezi zinyanga ezedlule besinemali engadluli ngisho kuR4 000. Namanje asimfuni umuntu oza nemali ezosifaka ezinkingeni ngoba sisebenzise nabantu abanombono ngeNingizimu Afrika engenayo inkohlakalo,” kusho uGumbi.
UGumbi uke wabamba ekubeni usihlalo weNFP ngaphambi kokubangisana wayilaxaza.
Ukusho lokhu nje ngoJulayi omunye wabaholi beNFP, uMnuz Ericson Zungu waveza ukuthi inhlangano yabo ayinamali ngoba ithathwe uMnuz Vikizitha Mlotshwa wayifaka eqenjini likaGumbi.
“Sonke siyazi ukuthi uGumbi akanamali ngakho kuyasicacela ukuthi neqembu lezombusazwe aliqalile ulekelelwe uMlotshwa. Kumanje iNFP inamahhovisi avaliwe njengelami eliseNewcastle ngoba izimali azikho,” kusho uZungu.
UMlotshwa ukuchithile lokho, wathi usola sengathi uZungu uphazamisekile emqondweni.
“Ngiyasola ukuthi uZungu njengoba ebegula, akakalulami kahle yikho evele ahheme akhulume izinto ezingekho.
Ucabanga ukuthi ngingathi ngihola iNFP bese ngiphinde ngibhekane nezinye izinhlangano.
Okokuqala yimi engaphumela obala ngagxeka uGumbi nenhlangano yakhe. Ngasho ukuthi umlilo wamaphepha lona,” kuchaza uMlotshwa.
Uthe ihhovisi likaZungu eliseNewcastle balivala ngoba bexakwe ukuthi uyivila.