I-ANC nesiphakamiso ngamathenda
I-ANC KwaZulu-Natal ifuna kuqiniswe uhlelo lokukhishwa kwemisebenzi kuhulumeni olwaziwa ngamathenda njengoba nombiko wekhomishini ebiphenya ngokubulawa kosopolitiki kulesi sifundazwe ibalule amathenda njengenye yezimbangela zokubulawa kwabaholi.
Le nhlangano iyalele uNdunankulu wesifundazwe uMnuz Willies Mchunu ukuthi ajube umgcinimafa ukuthi abuke lapho kungaqiniswa khona endabeni yamathenda.
UNobhala we-ANC esifundazweni uMnuz Mdumiseni Ntuli, uthe bafuna ukwazi ukuthi ikuphi okumele kwenziwe ukuqinisa ukukhishwa kwamathenda.
“Sikhathazekile ngodaba lwamathenda yingakho sinxuse uNdunankulu ukuthi asebenzisane nomgcinimafa kutholakale lapho kuxega khona. Kumele kuqiniswe ngoba nombiko kaMoerane uyibalulile eyamathenda,” kusho uNtuli.
UNtuli, obekhuluma esithangamini sabezindaba eThekwini izolo uthe baqoke ithimba elizosebenza indaba yalo mbiko ukuze liqhamuke nezinto okumele zenzeke.
Leli thimba liholwa ngokhulumela le nhlangano esifundazweni uNkk Nomagugu Simelane-Zulu kanti abanye abaholi abangamalungu alo kubalwa uNgqongqoshe wezokuThutha nokuphepha uMnuz Mxolisi Kaunda, uMnuz Bheki Ntuli, uMnuz John Jeffreys noMnuz Cyril Xaba kanjalo noNkk Nonhlanhla Khoza.
“Leli thimba lizophuma nomkhombandlela wezinto okumele sizenze. Uma liphakamisa ukuthi kumele kwenziwe okuthile kumuntu we-ANC othinteka kulo mbiko siyokwenza njengoba lisho.”
Uthe umbiko wekaMoerane uzothulwa ekomitini elibheka ukusebenza kwansuku zonke le-ANC.
Kuzokhumbuleka ukuthi le nhlangano iyona eyanxusa uMchunu ukuthi asungule ikhomishini kulandela ukufa kwabaholi abahlukene bamaqembu ezepolitiki.
UNtuli ubonge abafakaze kule khomishini wathi uyazi kwabanye kuvuke amanxeba neminjunju esiyadlula.
Unxuse ukuthi namanye amaqembu enze okufanayo ne-ANC athathele izinyathelo ezinqala labo abathinteka emacaleni obugebengu.
Ushayele ihlombe amaphoyisa abophe abasolwa emacaleni ahlukene okubulawa kwabaholi bezepolitiki kubalwa nabale nhlangano.
“Ezinyangeni ezimbili ezedlule kuboshwe abasolwa abangu-28 ngamacala ehlukene athinta ukusocongwa kosopolitiki. Kuboshwe nababulala uMnuz Sindiso Magaqa noMnuz Musawenkosi Mchunu.”
Uphawule nangecala elibhekene noNobhala waseGeneral Gizenga (KwaDukuza) uMnuz Musa Zondi wathi bazolinda umthetho bese belandela imigudu yangaphakathi.