Ubona ikhono lingamvulela iminyango emisakazweni
UTHEMBE ikhono lakhe uKholiwe “NtombiyomZulu” Maphumulo ukuthi lizomvulela iminyango ebheke emisakazweni emikhulu njengoba esayibambe esiteshini somphakathi saseMnambithi, Inqubeko FM.
UKholiwe (29) odabuka esigodini sakwaHlathi, wethula uhlelo lukamaskandi, Ezomdabu, olungena ngo-12 kuya ku-3 ntambama ngoMgqibelo.
“Noma kunzima ukufinyelela emisakazweni emikhulu kithina esizinze emakhaya kodwa ngekhono lami ngiyazethemba, angizingabazi ngalo.
“Ngelinye ilanga ngizibona ngifinyelela empumelelweni noma kungelula,” kusho uKholiwe.
Uthe ubukela kakhulu kumsunguli wamaCrown Gospel Music Awards, uZanele LaMbokazi, owayengumsakazi woKhozi FM, okuwumsakazo akhule ewulalela futhi elingisela abasakazi bawo.
“Nginesifiso sokuhlangana naye ngincele ulwazi ngoba ngikhonze kakhulu ukubuza ukuze ngandise ulwazi enginalo kwezokusakaza,” kusho uKholiwe.
Uthe wangena kwiNqubeko FM ngemuva kokwenza inhlolokhono ngo-2016.
Waqala wethula uhlelo iSiyacobelelana olungena ngo-7 kuya ku-9 ebusuku ngoMsombuluko kuya kuLwesihlanu.
“Bangamukela kahle nabalandeli balo ngadluliselwa ohlelweni olwalungena ngoLwesihlanu iLate Night Show olugxile kwi-house negqom’. Ngibuye ngibambe uhlelo lwantambama ngo-3 kuya ku-6 uma engekho uzakwethu.”
Uthe ngohlelo lwakhe lukamaskandi uke waqokwa kumaMaz Herbal Awards nakumaKZN Capital Maskandi Awards okuyilapho athola khona izindondo ezimbili zeBest Traditional Radio Presenter neyeBest Traditional Show.
UKholiwe ufunde eLubelo Primary waphothula umatric eSigweje High ngo-2010.
Ube esedlulela eLadysmith TVET College lapho enze khona iFinancial Management ayiphothule ngo-2013. Kwabo bayisihlanu, abazali babo basekhona bobabili.
Ngaphandle kokusakaza uphinde afundise ukushayela esikoleni esisendaweni futhi unenkampani iKholiwe Maphumulo Foundation ehlela imicimbi.