Umndeni ukhathazekile ngelungu elithunjiwe
UKHATHAZEKILE umndeni kasomabhizinisi esekunamasonto enyamalele emuva kokuthunjwa abantu ababezenza amaphoyisa.
UMnuz Skhumbuzo Mjwara (41) ongumnikazi wendawo ephambili yokudlela eseMhlanga iBarrio uduke ngo-Agasti 30 nonyaka esenkantolo yaseVerulam.
UMjwara obesanda kuthenga imoto futhi enenqwaba yamabhizinisi, kuze kube yimanje akwaziwa ukuthi ukephi. Umfowabo uMnuz Philani Bhengu, uthe abasazi ukuthi kumele benzenjani njengoba umfowabo engatholakali. “Umfowethu wayesenkantolo ecaleni elithinta amabhizinisi akhe njengoba bekunombango okhona. Ubehamba nonkosikazi nonogada wakhe ngesikhathi ethunjwa abazenza amaphoyisa. Bamfaka emotweni eyiveni bakhala bemuka naye. Sibe sesivula icala lokuthumba njengoba singamazi namanje ukuthi ukephi, sikhathazekile kakhulu ngaye,” kusho uBhengu .
Isolezwe lithole ukuthi lo somabhizinisi ngo-Agasti 31, kunemali enguR30 000 eyakhishwa ebhange lakhe.
Okhulumela amaphoyisa KwaZulu-Natal, uLt. Colonel Thulani Zwane, ukuqinisekisile ukuthi bayaphenya ngokuduka kwalo somabhizinisi.
“Amaphoyisa aseVerulam aphenya icala lokuthunjwa komuntu. Akekho osaboshiwe kodwa uphenyo lusaqhubeka,” kusho uZwane.
UBhengu uthe okwenza kube nzima kulolu daba ukuthi umuntu okwakumele agade umfowabo naye usengena ezintangeni ngokulahleka kwakhe, avale nocingo angabe esatholakala ukuze achaze ukuthi umuntu ayemgadile wathunjwa kanjani phambi kwakhe.
Imizamo yeSolezwe yokuthola owayengunogada walo somabhizinisi ayizange iphumelele njengoba engatholakalanga ocingweni.
Amaphoyisa anxusa ongaba nolwazi ngokuduka kwalo somabhizini ukuba athinte noma yisiphi isiteshi samaphoyisa.