Izingwazi zithungatha amakhaya
AYATHUSA amagama abadlali okuze kube yimanje basaphuma bengena bezama imisebenzi emaqenjini adlala ngaphansi kweAbsa Premiership yize abanye babo bebeshubisa umdlalo wabakhaya baseSoweto, phakathi kweKaizer Chiefs ne-Orlando Pirates.
Sekusele isikhathi esingaphezulu kancane kwenyanga zinqwamane okokuqala kule sizini lezi zinkunzi zaseSoweto kodwa abadlali abafana noTendai Ndoro, Tsepo Masilela noSiboniso “Pa” Gaxa basathungatha amakhaya amasha.
Iwindi lokushintshana ngabadlali lize lavala laba badlali kungaveli lutho ngabo. Kuke kwavela okuthile ngoNdoro oshiye kwi-Ajax Cape Towns ngemuva kokuphambana kwezinkomishi okwenzeke ngalo mdlali waseZimbabwe. Lokhu kuholele ekutheni i-Urban Warriors idliwe yizembe.
Kuke kwaqonga amahlebezi abekhomba lo mgadli oseqenjini lesizwe laseZimbabwe kwiHighlands Park. Nokho kuvele ukuthi ukuthi umqeqeshi u-Owen Da Gama uzimisele ngokumsayinisa kodwa izikhulu zabona kungcono zingakwenzi lokho ngoba zibona ukuthi abagadli abakhona banele. Nakuba ingamunyungwanga kakhulu kodwa kuyavela nokuthi imali ebifunwa yilo mgadli, iHighlands ibingeke iphumelele ukumnika yona.
UMasilela, okwenze konke ebholeni laseNingizimu Afrika waze wayodlala nakwiSpanish La Liga, kuyamangaza ukuthi akanaqembu kusukela inkontileka yakhe ingavuselelwanga kwiChiesf ngoJuni 30. UMasilela ujwayele ukubhala ezinkundleni zokuxhumana ukuthi usazimisele ngokudlala. Indaba yakhe ebimumatanisa neMaritzburg United esanda kuchithwa yiChiefs iphikiwe.
Omunye umdlali oke wayidlala kowabakhaya kodwa okungaveli lutho ngaye uGaxa. Ugcine ukubonakala kwi-Ajax kodwa akuqondakali noma usekhona kuyona kodwa akukho okunye okuvelayo. Sisekuyona i-Ajax nobengukaputeni wayo uTravis Graham akanalo iqembu. Lo mdlali ubengadlali nangesizini edlule kodwa akukaze kucaciswe ukuthi kungani ebengadlali.
Nabadlali abafana noThato Mokeke, ogcine ukubonakala kwiSuperSport United, basazama amakhaya amasha. Omunye umdlali osezingeni kodwa ongenaqembu uTsepo Gumede ogcine ukubonakala kwiCape Town City. Uke wagqama kwiPirates.
Abanye abafana noNdiviwe Mdabuka obekwi-Ajax noSibusiso Masina, naye obedlala ngaphansi kukaBenni McCarthy kwiCity, naye akanalo iqembu.