Ubhekwe enkundleni obedlala ukulimala
UMGADLI weSuperSport United, uBradley Grobler, akafuni bakufake emakhanda ukuba sefomini kwabo uma beqhathaniswa neCape Town City abazobhekana nayo kowamanqamu weMTN8 eMoses Mabhida Stadium, eThekwini, ngoMgqibelo.
ISuperSport iyona evikela indebe eyiwine ngesizini edlule ihlula iThe Citizens eMabhida. Kusukela kuqale isizini, Amatsatsantsa enza kahle uma kuqhathaniswa nesizini edlule.
Agcine engene ngopotsho kwiTop 8 emuva kwecala le-Ajax Cape Cape Town elithinta umgadli uTendai Ndoro. ICity ayiqalanga kahle kwazise isawine umdlalo owodwa weligi ehlule kuwona iSuperSport kuvulwa isizini.
ISuperSport isalokhu iqhubekile nokuqoqa amaphuzu. Nakuba zonke izinto zibukeka zivuna Amatsatsantsa kodwa uGrobler akafuni kubabuse lokhu.
“Iqembu liqale kahle uma uqhathanisa nendlela esidlale ngayo ngesizini edlule. Sidlale kahle kakhulu kweminye imidlalo. Sifuna ukuvikela indebe yethu. Sijabule ukuya kowamanqamu kubhekwe thina ukuthi siwine. Kukhombisa ukuthi iqembu lenza kahle nomqeqeshi wenza kahle nabadlali bajabule futhi,” kusho uGrobler.
“Ifomu iyasebenza kodwa emidlalweni efana nalena kusafanele sisebenze ngosuku lomdlalo. Bayiqembu elihle elinejubane, abadlali beCity bayakuthokozela ukudlala nomqeqeshi uyabavumela. Imiphumela ayibavumi kodwa baseyiqembu elihle. Noma ubani obathatha kancane ngenxa yemiphumela yakamuva uzojeza kakhulu. Okwamanje indebe akuyona eyethu, kusafanele singene ekundleni siyisebenzele. Siyazethemba kodwa hhayi ngokweqile.”
Isizini edlule ayibanga nenjabulo kuGrobler naseqenjini lonke ngaphansi komqeqeshi u-Eric Tinkler osule sekukubi, iqembu lingasemsileni we-log. Ligcine lisindiswe nguKaitano Tembo.
UTinkler watshela abezindaba ukuthi selokhu afika kwiSuperSport, uGrobler akakaze aziqeqeshe neqembu kuze kuphele isonto ngenxa yokulimala njalo. Nakuba uGrobler eyithwale waze wayifaka kowamanqamu weMTN8 iSuperSport kodwa ngempelasonto akadlalanga ngesikhathi ezakhe zithela ngehlazo lika 4-1 iBlack Leopards koweligi. Kuvele ukuthi uphinde wathinteka.
“Kade kubuhlungu ukushaya amagoli, ngilimele, ngiyohlinzwa bese ngihlala isikhathi ngingadlali. Ngithi ngiyabuya, ngiphinde ngilimale, ngihlale izinyanga eziyisikhombisa ngizama ukubuyela esikimini. Engizitshele khona akukhona ukuthi ngifuna ukuzuza okuthize kule sizini nesibalo samagoli engifuna ukuwashaya. Kodwa ngifuna ukudlala njalo, ngingalimali.
“Ngesonto eledlule ngizwe ubuhlungu. Ngenxa yerekhodi lami (lokulimala njalo) angifunanga ukuzibeka engcupheni. Kufanele kunconywe umqeqeshi ngoba uyakuqonda ukuthi ngiphumaphi nendaba yokulimala. Kade engeseka indlela yonke. Lokho kungisebenzele, ngicabanga ukuthi kuzongisebenzela isizini yonke,” kusho uGrobler.