Ubheke ukuthatha iso likaSolinas
UGABE ngabakhaya bakhe abazomsiza asheshe ukuzinza kwiKaizer Chiefs ukaputeni weqembu leNedbank Ke Yona, uNkanyiso Nene, obheke ukuthatha iso lomqeqeshi uGiovanni Solinas eNaturena.
UNene, waseMgungundlovu, uyibamba maphakathi emuva. Uzoziqeqesha neChiefs inyanga yonke ngenhloso yokuzitholela inkontileka eqenjini.
Izolo emcimbini obukade useMelrose Arch, eGauteng, abadlali abawu-16 beKe Yona bacazelwe amaqembu e-Absa Premiership. Emuva komdlalo waleli qembu nompetha bangesizini edlule, kuqalwe ukuvota lapho abalandeli kade beqoka umdlali abafuna ayofakwa eqenjini labo. Bathathu abadlali baKwaZulu-Natal abebekade beseqenjini leKe Yona. ULwazi “Mugabe” Mgwaba waseShowe uzozama inkontileka kuMaZulu kuthi uSibonelo Majozi waseMlaza ayojulukela indawo esikimini sePolokwane City, eLimpopo.
ENaturena, uNene uzoficana nabadlali baseMphithi okunguDumisani Zuma, Philani Zulu noRyan Moon. Abanye baseKZN nguSiphelele “Stashi” Ntshangase wasoPhongolo noSiyabonga Ngezana waseTholeni ngaseMnambithi.
“Bengivele ngilindele ukuthi ngizoya kwiChiefs ngoba abantu abaningi bangakithi kade besho ukuthi bafuna ukungisa kuyona. Ngijabule kakhulu ukuyojima neChiefs ngoba iyiqembu elinegama. Inhloso yami manje wukuthola inkontileka. Ngizosebenza kanzima ngilalele abaqeqeshi. Ngikholwa wukuthi uma ngenza kanjalo ngizoyithola inkontileka,” kusho uNene.
“Okuzongisiza kakhulu wukuthi kukhona abantu engibaziyo kwiChiefs nokuzongenza ngisheshe ngijwayele. Sekusezandleni zomqeqeshi ukuthi yini ayibonayo kimina. Ngibonga kakhulu iNedbank ngakho konke. Sekusezandleni zethu sonke ukuthi sithole izinkontileka emaqenjini.”
UMgwaba, ongumgadli, ozothola ithuba lokuzibonakalisa kumqeqeshi uCavin Johnson oSuthwini, uthe nakuba ebengathanda ukuphuma ngaphandle kweKZN kodwa kuyinto enkulu ukuya kuleli qembu.
“Ngijabule kakhulu ukuthi ngiya oSuthwini. Ngiyethemba ukuthi bazongamukela ngezandla ezifudumele. Inkontileka ngizoyithola. Ngiyazi ukuthi umqeqeshi weqembu leMDC (Multichoice Diski Challenge) uDlamini (Ayanda) kade ewumgadli ngakho kuningi engizokufunda kuyena ngaphambi kokuya eqenjini elikhulu,” kusho uMgwaba.
UMajozi uthe: “Njengoba ngangisho ukuthi noma yikuphi lapho ngizoyiswa khona ngizokwamukela. Indlela engilambe ngayo futhi njengoba nesimo sasekhaya singesihle, yimina ozoshintsha lokho. Ngakho leli thuba ngiyalibonga kakhulu. Ngiyazibona ngiyithola inkontileka.”
Asivile Tim (Highlands Park), Axolile Kapo (Maritzburg United), Buyelekhaya Velelwandle (Bloemfontein Celtic), Cameron Paulse (Orlando Pirates), Jeremiah Mathonsi (SuperSport United), Karabo Mookamedi (Mamelodi Sundowns), Lesley Pietersen (Free State Stars), Lunathi Mdatyulwa (Chippa United), Mzikayise Williams (Cape Town City), Sipho Sibiya (Baroka), Tahabo Mogotsi (Black Leopards), Xolela Bonxa (Lamontville Golden Arrows).