UFredericks uthipha iSuperSport kwiMTN8
UBONA iSuperSport United kuyiyona ezokhala yemuke nesicoco seMTN 8 uStanton “Stiga” Fredericks oke wadlalela iKaizer Chiefs eminyakeni edlule.
Amatsantsantsa a Pitori azotholana phezulu neCape Town City FC emdlalweni wamanqamu weMTN 8, ngoMgqibelo ngo-7 ebusuku, eMoses Mabhida Stadium, eThekwini.
Ngokusho kukaFredericks, odlale kwiChiefs kusuka ngo2001 washiya ngo-2004, abadlali iSuperSport enabo banesipiliyoni kakhulu uma kuqhathaniswa nabeThe Citizens.
UFredericks ubeyingxenye yezinkakha ezintathu eziqashwe abaxhasi iMTN ukukhangisa ngalo mqhudelwano eThekwini. Ubehamba noJabu Mahlangu (owayaziwa ngoPule) noFabian McCarthy.
“Ngibona iSuperSport kuyiyona eyizimfivilithi futhi esethubeni elihle lokuvikela lesi sicoco. Izizathu zami zimbili. Esokuqala, ukuthi abadlali bayo banamava. Uma ngingabala nje uFurman (Dean), Letsholonyane (Reneilwe), emuva kukhona uKhumalo (Bongani), Daniels (Clayton), phambili kukhona uRusike (Evans), uGrobler (Bradley) uma kuwukuthi uzobe edlala, uPhala (Thuso) ngakho uma kuziwa kweyamanqamu kukhona abadlali abawulolu hlobo uhleze uzoba sethubeni elihle lokunqoba izicoco,” kusho uFredericks.
Eqhubeka echaza uthe isizathu sesibili esenza ukuthi athiphe Amatsatsantsa ukuthi asefomini enhle kulezi nsuku nakuba engayiqalanga kahle isizini.
“Abakwazi ukunqoba imidlalo kuqala isizini, uma nje ungabuka imidlalo emibili iSuperSport eyidlale kuqala isizini uyabona ukuthi bekusaqhubeka izinkinga zangesizini edlule. Kodwa izinto zabo zishintshe ngesikhathi bewashisa ijezi i-Orlando Pirates kuma-quarter final kwiMTN 8. Ngemuva kwalokho sibone umqeqeshi (uKaitano Tembo), efaka abadlali abangajwayele ukudlala kodwa benza kahle. Lapha ngibala uFagrie Lakay, Teboho Mokoena noGhampani Lungu abafike bagila izimanga. “Ngaphezu kwalokho ezikaTembo zinesipiliyoni nasebhentshini, isibonelo nje uMorgan Gould oselizwa ngendaba ijezi kuKhumalo. Ngakho umqeqeshi ukwazile ukusebenzisa abadlali abancane nabadala kwaphuma ulozolo lwento,” kuqhuba uFredericks oke wadlalela iPirates neBidvest Wits.
Ngesizini edlule kudlale amaqembu afanayo kowamanqamu kuyona belu iMTN 8, enkundleni efanayo. ISuperSport yayicijwa u-Eric Tinkler, iphini lakhe kunguKaitano Tembo. ISupersport yanqoba sekukhahlelwa amaphenathi ngemuva kokuthi umdlalo uphele ngo 1-1.
Kwaba khona ukukhuluma okuthi uMcCarthy washoda ngamava okuthi anqobe umdlalo, kwazise ezakhe zahamba phambili isikhathi eside kodwa zaya ekhaya zingaphethe lutho.
“Ngicabanga ukuthi uBenni ufundile kokwenzeke ngesizini edlule.
Ngokwami ungumqeqeshi odlondlobala ngamawala, ngakho ngibheke ukuthi afune ukuziphindiselela kwiSuperSport. Okuhle ngoMcCarthy ukuthi uyakwazi ukuthi kubuhlungu kanjani ukwehlulwa kowamanqamu esengumdlali, njengoba kuphinde kwamenza esengumqeqeshi,” kuphetha uFredericks.
UMcCarthy uke wasinqoba isicoco seMTN 8 ngo-2011 esagijima kwiPirates, kanti noTembo uke wasinqoba ngo-2004 sisabizwa ngeSAA Super 8 neSuperSport.