Udlisele ogageni eba ngovelele
ULOKHU eqhubekile nokuqhakaza uBongi Msomi ongukaputeni weqembu lesizwe le-netball njengoba kulokhu eqokwe waba ngumdlali ovelele wesifazane waKwaZulu-Natal.
Lokhu kwenzeke ngesikhathi kunomcimbi wokubungaza abadlali bakulesi sifundazwe e-Inkosi Albert Luthuli International Convention Cetre ngoLwesibili ebusuku.
UMsomi (30) udlisele ogageni umdlali weqembu lesizwe lebhola lombhoxo amaSevens, uZinhle Ndawonde noCarmel Billson owenza umdlalo i-lifesaving.
Uthola lo mklomelo ubesetshisa izindaba zokuthola inkontileka entsha neqembu laseEngland iWasps Netball azoqala kuyona ngoJanuwari.
Kulo nyaka lo mdlali ongacosi phansi kubalandeli be-netball ubedlala kwi-Adelaide Thunderbirds yase-Australia.
“Ngijabule kakhulu ngokuthi ngithole inkontileka entsha neWasps. Ngesikhathi kuphela isizini eqenjini (iThunderbirds) bebenginika inkontileka entsha kodwa ngakhetha ukuya kwiWasps,” kusho le ntokazi edabuka eHammarsdale.
Ngo-2017 udlalile kwiWasps wanqoba isicoco seSuper League nayo ebese kungesesibili njengoba ngaphambi kwalokho esinqobe edlala kwiSurrey Storm.
Ephawula ngokunqoba kwakhe umklomelo ovelele ubalule ubunzima ababebhekana nabo bengabantu besifazane kwezemidlalo.
“Ngisebenza kanzima ekudlaleni i-netball okuyinto engiyithandayo. Lo mklomelo akuwona owami kuphela kodwa owomndeni wami owaziyo lapho engisuka khona namaProteas.
Ngisuka kude, ukuhlonishwa njengomdlali we-netball kusho lukhulu, ikakhulukazi njengoba lo mdlalo usesezingeni lama-amesha kuleli. Ngethemba ukuthi maduze uzoba sezingeni elingcono.
“I-KZN yisifundazwe esikhulu, kuyangijabulisa ukuthi kubona bonke abantu bagcine bekhethe mina kwabanye abesifazane abenza kahle. Akulula ukuba umdlali wesifazane ukuthi unakwe. Ngiyabahlonipha abafinyelela ezingeni lokuthi bakwazi ukumela izwe,” kusho uMsomi.
Ufike kuleli ngoMsombuluko ebusuku ephuma ukuyomela izwe kwiQuad Series ebise-Australia, lapho bedlale ne-Australia, New Zealand, ne-England.
Uthe isifiso sakhe wukuthi amaProteas anyukele endaweni yesine emhlabeni.
“Sesiside isikhathi sihleli endaweni yesihlanu. Isifiso sami wukuthi sinyukele endaweni yesine.”
NgoNovemba amaProteas azodlala kwiDiamond Challenge okuwumqhudelwano wamazwe ase-Afrika.
Ngonyaka ozayo azobe eyibamba kwiNdebe yoMhlaba eLiverpool, e-England ngoJulayi. Eminye imiklomelo ebibhekiwe n Sportman of the Year: Henri Schoeman n Coach of the Year: Fadlu Davids n Team of the Year: Maritzburg United n Newcomer of the Year: Sibusiso Msomi n Sport Personality of the year: Zinhle Ndawonde