UDladla usenesifiso sokumgcina uFaty

INKULUMO yomqeqeshi weReal Kings uSimo Dladla, ayikhulume ngesikhathi ezakhe zidlala ngokulingana neTS Galaxy ngeledlule, ihumusheke ngokuthi uselindele noma yini ngesikhwishikhwishi seqembu uPapy Faty ongakadlali selokhu aquleka enkundleni ngenyanga edlule.

UDladla uthe uma isibhedlela singase sithi uFaty odabuka eBurundi ngeke aphinde alidlale ibhola elikhokhelayo, kungabe kusho ukuthi sekufanele amzamele indlela yokuba abe ngaphakathi kwiKings, ngoba abadlali abasakhula bafunda lukhulu kuyena.

Ngokusho kwalo mqeqeshi ongayiqalanga kahle isizini kwiNational First Division (NFD), nakuba imkhathaza indaba yokungalulami kukaFaty kodwa uma kungenzeka odokotela baqhamuke nelithi ngeke esaphinde adlale unobhutshuzwayo, impilo iyoqhubeka.

“Sisalinde umbiko ngoFaty, ithimba lodokotela bethu nesibhedlela ayelele kusona bebengakasiniki lutho olubambekayo. Nokho ngingakuqinisekisa ukuthi akakakulungeli ukudlala njengamanje. Kodwa ngicabanga ukuthi sinabadlali abenele ukuvala isikhala sakhe. Engingathi sishoda ngakho okwamanje kuseyinhlanhla nje kwaphela,” usho kanje uDladla.

Ebuzwa yileli phephandaba ukuthi uma umbiko ongaphuma esibhedlela ungalibeka ngembaba elithi uFaty ngeke aphinde adlale angakuthatha kanjani, uDladla uthe: “Kungangikhathaza kancane ngoba Faty ungumdlali okhethekile, futhi ongakunqobela umdlalo noma yinini. Okunye ukuthi bengihlele ukuba kube nguyena ohola iqembu kule sizini. Uma kungathiwa akasakulungele ukudlala, lokho kungasho ukuthi kufanele ngizame indlela yokumgcina ngaphakathi eqenjini ngoba abadlali abasakhula bayamdinga kakhulu.”

UFaty ubedlalela iBidvest Wits nokuyilapho indaba yokuquleka kwakhe enkundleni igqame khona. Odokotela bamazisa ukuba unenhliziyo engekho esimeni sokuthi angaba ngumdlali webhola, ngaleyo ndlela kwaba ukugqabuka kwefindo phakathi kwakhe neZitshudeni.

Ube eseyodlalela iRoyal Eagles kwiNFD, nayo emhambise kodokotela babika okufanayo, njengoba egcine esekwiKings.

Umphumela wayizolo: Uthongathi 3-0 Real Kings. Imidlalo yeNFD: Kusasa: Cape Umoya United v Mbombela United (Cape Town Stadium, 3pm) NgoMgqibelo ngo-3 ntambama: Stellenbosch v Real Kings (Athlone Stadium); TS Sporting v Ubuntu Cape Town (Kabokweni Stadium); Tshakhuma Tsha Madzivhandila v Jomo Cosmos (Thohoyandou Stadium); Royal Eagles v Uthongathi FC (Chatsworth Stadium) NgeSonto ngo-3 ntambama: TS Galaxy v Witbank Spurs (Kameelrivier Stadium); Richards Bay v Ajax Cape Town (Umhlathuze Sports Complex)

Isithombe: BACKPAGEPIX UPAPY Faty weReal Kings FC angase angaphinde adlale ibhola elikhokhelayo ngenxa yokuhlushwa isifo senhliziyo

USTEPHEN Mokoka emukela indebe ku-Elana Meyer oyinxusa ngemuva kokudla umhlanganiso kwiCape Town Marathon ngeSonto Isithombe: BACKPAGEPIX

THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.