Ungqongqoshe ubopha abathunaza igama lakhe
UBOPHA abasola ngetulo lokumdicilela phansi uNgqongqoshe wezokuBusa ngokuBambisana nezindaba zoMdabu KwaZulu-Natal, uNkk Nomusa DubeNcube, njengoba ethi kukhona abalokhu beqhubekile nokuthi nguyena owenza ukuthi umyeni wakhe uMnuz Sibusiso Ncube aqhubeke nokuthola imisebenzi kuhulumeni.
Isitatimende esikhishwe nguNkk Dube-Ncube sithe bakhona asebathathele izinyathelo zomthetho angeke abaveze mayelana nokuthi bayaqhubeka nokuzama ukumdicilela phansi.
Uthe lena imizamo yokumdicilela phansi nokuthunaza isithunzi sakhe njengoba kubhekwe okhethweni.
“Ezinye zezinto yizinto engihlale ngiziphendula ngisho esiShayamthetho. Njalo uma kuza lesi sikhathi sokhetho noma izingqungquthela zombutho kuba nemikhankaso yokungidicilela phansi.”
Uthe njalo kuthiwa umyeni wakhe uthola amathenda kuhulumeni kodwa bangavezi ukuthi nasemkhakheni ozimele uyayithola imisebenzi.
“Namanje ngisasho, umyeni wami kade aqala ukwenza imisebenzi nohulumeni, ngingakabi ngisho nakuhulumeni. Isibonelo nje enye yezinkampani zakhe eyenza umsebenzi wokugada izakhiwo yaqala ukwenza umsebenzi nomnyango wezohulumeni basekhaya, owezindlu nowezobuholi bomdabu kusuka ngo-2005. Akekho umuntu owanaka lokhu ngalesi sikhathi. Wenza umsebenzi ngisho emakhaya azimele, enxanxatheleni yezitolo angingeni mina kumabhizinisi akhe, ngisho ngingakashadi naye ngangivele ngisebenzela umphakathi,” kusho uNkk Dube-Ncube.
Uthe eminyakeni emihlanu edlule umyeni wakhe uthole izinkontileka zika R11 million eminyangweni ehlukene kahulumeni.
“Ngike ngaba seCzech Republic ngiyinxusa iminyaka emihlanu, umyeni wami eqhubeka nemisebenzi. Ubengekho ezindabeni ngaleso sikhathi yingakho ngibona ukuthi inhloso wukudicilela phansi igama lami. Laba abenza lokhu abavezi futhi nokuthi uthola imisebenzi ngaphandle kwakuleli ngoba bafuna ukwakha lesi sithombe esibi.”
Uthe selokhu ajoyina uhulumeni kuyehla ukuthola ibhizinisi komyeni wakhe kuhulumeni wathi kwayena wakuveza njengoba eyilungu lePhalamende ukuthi umyeni wakhe usemabhizinisini.
Uqhube wathi useke waphendula imibuzo esiShayamthetho ngalolu daba wathi uzoqhubeka futhi aphendule ngaphandle kwenkinga.