Kudideke umndeni ebulawa umngani
USASHAQEKILE umndeni wowesilisa odutshulwe umngani wakhe ezama ukulamula ingxabano phakathi kamsolwa nentombi yakhe eRichmond Farm ngaphandle kwaseThekwini.
UMnuz Sakhile Gwala (44) obesebenza njengomqaphi wosopolitiki, ushonele emtholampilo waseLindelani ngoLwesithathu ebusuku kulandela ukudutshulwa umsolwa ongumngani (25) wakhe omkhulu .
Isolezwe lithole ngomthombo osondelene nalolu daba ukuthi umsolwa, ongeke adalulwe njengoba engakaveli enkantolo, ubehlezi kubo nentombi yakhe nomufi.
Umsolwa uxabene nentombi yakhe wabe eseyibeka isandla.
Umufi kuthiwa ungenelelile, elamulela intombi kamsolwa, waze wayifihla emuva kwakhe ukuze umsolwa ezoyeka ukuyishaya.
Umsolwa kuthiwa uvele wakhipha isibhamu sakhe wadubula umufi ephindelela.
Umufi kuthiwa naye uzamile ukudubula umsolwa eselele phansi, wadubuleka onyaweni umsolwa.
Umsolwa kuthiwa ubalekile endaweni yesigameko kodwa ugcine ngokuboshwa khona ngoLwesithathu.
Okhulumela amaphoyisa KwaZulu-Natal uCaptain Nqobile Gwala, uthe icala lizongena enkantolo yaseNtuzuma namhlanje yize umsolwa egadwe amaphoyisa esibhedlela.
“Amaphoyisa aseNtuzuma avule icala lokubulala nelokuzama ukubulala. Ngokophenyo olusenziwe owesilisa oneminyaka engu-44 udutshulwe eRichmond Farm. Ubenamanxeba amaningi okudutshulwa emzimbeni, uphuthunyiswe emtholampilo, washonela khona. Umsolwa oneminyaka engu-25 naye udubulekile emlenzeni, ube esebaleka endaweni yesigameko, ugcibe eboshiwe. Uyiswe esibhedlela, kanti futhi ugadwe amaphoyisa. Icala lizongena enkantolo yaseNtuzuma kusasa (namhlanje) engekho umsolwa,” kusho uCaptain Gwala.
Isolezwe lithinta umfowabo kamufi, uMnuz Nhlanhla Gwala, uthe kusenzima nokuthi bengakhuluma ngalolu daba ngoba bebengamathe nolimi laba bangani.
“Sisashaqekile siwumndeni ngokwenzekile ngoba laba bobabili bebesondelene kakhulu, sisaxekekile ngempela ukuthi bekwenzenjani. Asikwazi ngisho nokulukhuluma lolu daba ngoba nathi kuningi okusixakayo ngalo. Esikwaziyo nje ukuthi umfowethu udutshulwe umuntu abezwana naye, washona. Silahlekelwe kakhulu, sididekile,” kusho uGwala.
Ebuzwa ngodaba lokulamula intombi nomsolwa ngesikhathi kudutshulwa umfowabo, uthe akafuni ukungena kulolo daba ngoba okwamanje basabheka ukuthi bahlangane nomndeni behlele nelanga lokufihla.
Uthe umndeni kamsolwa ubachazele okwenzekile, wangafihla lutho ngakho bagculisekile.
Isolezwe lithole ukuthi umsolwa uyisosha. Bobabili laba bebephethe izibhamu ngesikhathi sesigameko kodwa bengekho emsebenzini.