Kugqugquzelwe abase-Afrika
IMBONGI, uLebo Mashile, igqugquzele abasiki bengqephu base-Afrika ukuba kube yibona abahamba phambili ekuthungeni izimpahla ezakhelwe imizimba yabantu baleli zwekazi.
ULebo ukusho lokhu kade ethula inkulumo emcimbini wokuvulwa ngokusemthethweni kwe-Africa Fashion Exchange obuse-Greyville Convention Centre, eThekwini izolo.
ULebo uthe kwamphatha kabi kakhulu okwenzeka eminyakeni eyisishiyagalombili edlule ngesikhathi iphephabhuku elalifake isithombe sakhe ekhasini lokuqala lenza umzimba wakhe ubukeke sengathi muncane ekubeni ongowesifazane owondlekile.
Uthe kuwukubukela phansi abantu base-Afrika ukuba kuvezwe sengathi abantu ekumele bephumelele kunoma yimiphi imikhakha kube abantu abancanyane ngokomzimba nabampofu ekubeni inqwaba yabantu base-Afrika bemnyama ngebala futhi bondlekile.
“Angiyena uchwepheshe kwezemfashini njengoba ngiyimbongi, umbhali nomculi kodwa kumele kube abasiki bethu base-Afrika abasithungela izimpahla ezifanela imizimba yethu,” kusho uLebo. Isikhulu seKwaZulu-Natal Fashion Council, uDkt. Joy Ndlovu ngesikhathi evula lo mcimbi ngokusemthethweni, uthe kunabathungi abavela emazweni ahlukene ekubalwa i-Uganda, Namibia, Botswana namanye abazoveza amakhono abo.
“Lo mcimbi wezinsuku ezintathu sizobona zonke izinhlobo zengqephu yase-Afrika siphinde sithuthukise amakhono abathungi begqephu bethu,” kusho uDkt Ndlovu.
Omunye wabasiki bengqephu osemncane, uNksz Makhosi Ntshangase wase-Gamalakhe onenkampani i-Sistaz felaz, ubekhombisa ngezimpahla zakhe izolo ebusuku ezinemibala egqamile.
“Okwenze ngagqugquzeleka ukuba ngithunge lezi zimpahla ukubona ukubaluleka kokuveza impahla yethu ukuthi nayo isesitayeleni,” kusho uMakhosi. Lo mcimbi we-AFX kulindeleke ukuba uphothulwe ngoMgqibelo ngemicimbi ezobandakanya abomdlalo uZalo neMbewu.