UGama uzulelwa ngamanqe
SIZULELWA ngamanqe isikhulu esiphezulu sakwaTransnet, uMnuz Siyabonga Gama, emuva kokuthi izolo sinikezwe izinsuku eziwu-10 ukuba sichaze ukuthi kungani singafanele ukuxoshwa.
Esitatimendeni esithunyelwe kwabezindaba, uSihlalo weBhodi yakwaTransnet, uDkt Popo Molefe, uthe banikeze uGama incwadi emazisa ukuthi kunesiphakamiso sokuthi kunqanyulwe inkontileka yakhe nenkampani.
Uthe unikeziwe izizathu zesiphakamiso okubalwa kuzo ukungalandelwa kwemithetho yokuphatha imali, eyokuthengwa kwempahla nokuqapha impahla yenkampani njengesikhulu esiphezulu.
“Ibhodi kalisabuthembi ubuholi bukaGama. Simtshelile noNgqongqoshe wamaBhizinisi kaHulumeni, uMnuz Pravin Gordhan ngesinqumo sethu. Simnikeze izinsuku eziwu-10 zokuthi asinike izizathu zokuthi kungani singafanele ukumxosha,” kusho uMolefe esitaimendeni.
Emuva kombiko weWerksmans Attorneys owathola ukuthi akulandelwanga umthetho ngesikhathi kuthengwa izitimela eziwu-1 064, kwabe sekumiswa izikhulu ezimbili zakwaTransnet ezibhekelele ukuthengwa kwempahla. NoGama wayezomiswa kodwa wayilwa le ndaba.
Kwavela ukuthi lezi zitimela zabiza uR509 million ngaphezu kwemali eyayikade ibekiwe ngesikhathi kushintshwa inkontileka eyayinikezwe iMitsui yaseJapan isinikwa inkampani yaseChina.
Imizamo yokuthola uGama ukuba aphawule ayiphumelelanga. Ucingo lwakhe belungangeni futhi akayiphendulanga i-sms athunyelwe yona. UNobhala Jikelele weSouth African Transport and Allied Workers’ Union, uMnuz Jack Mazibuko, uthe abakuboni kuwubuhlakani ukuxosha uGama kube kuphenywa ngokusetshenziswa kombuso