Izinyanga zifuna ukuthathwa njengabaholi benkolo
SEZIFUNA ukuthathwa njengabaholi bezenkolo izinyanga ezithi abefundisi abasehlukile kuzona ngoba sebelapha ngokufanayo, baphrofethe nabantu njengezangoma ezihlolayo.
Abelaphi bendabuko bakusho lokhu ezethulweni zabo phambi kweKhomishini eVikela Inkolo neziLimi, eholwa nguNkk Thoko Mkhwanazi-Xaluva. Kabafuni ukulawulwa yiTraditional Health Practitioners Act eyaphasiswa ngo-2014, ebabhangqa ndawonye nabelaphi basentshonalanga.
UNkk Phepsile Maseko onguMdidiyeli weTraditional Healers’ Organisation, uthe bayefana nabaholi bezenkolo ngoba nabo babiziwe. “Awusekho umehluko phakathi kwethu nabefundisi. Sebelapha njengathi basebenzise amafutha nezimbiza abazibiza ngamanzi angcwele. Baphrofethela abantu babatshele izinkinga zabo, lokho okufana ncamashi nokuhlola kwezangoma. Kukhona abefundisi ababiza itshe lemali ngokuhlola kodwa abalawulwa yilo mthetho wabelaphi owaphasiswa,” kusho uNkk Maseko. Uthe umthetho owaphasiswa bawuvuma ngoba befuna ukubhaliswa ngokusemthethweni, bathenjiswa ukuthi okunye kuzobuye kufakwe kuwo. “Ngisho uwufunda umthetho uyabona ukuthi awukhulumi nathi. Ukhuluma nezitshudeni ezifundele ukwelapha ekubeni thina silandela ubizo sibuye sithwase,” kusho yena.
Uthe bazohlangana ukudingida izethulo abazoziyisa ePhalamende. Uma bezilawula bazokwazi nokuhlunga abelaphimbumbulu. Uwuhlabile umkhandlu wabelaphi osunguliwe athe abahambisani nendlela osebenza ngayo.
UMnuz Sazi Mhlongo, iPhini likaSihlalo weCouncil for Traditional Healers, uthe ukusungulwa kwalo mkhandlu bekwenzelwa kona ukuthi bazimele. UMhlongo uthe balinde ukuthi babhaliswe ngokusemthethweni emnyangweni wezempilo ukuze bakwazi ngisho ukukhipha izincwadi zikadokotela.
Mayelana nokufanisa izinyanga nabefundisi uthe ukwelapha kuyefana kodwa umehluko wukuthi izinyanga zimba umuthi ehlathini. Uhulumeni kumele abhekisise indlela abefundisi bamanje abenza ngayo ukuthi kuseyikho yini okufanele.
UMfundisi Nathi Zondi, okhulumela inhlangano yabefundisi eThekwini, uthe kwakudala abefundisi bebelapha ngokomphefumulo. Uthe uma izinyanga ziziqhathanisa nabo ngokwenkolo kumele ziveze ukuthi zikusho ngani lokho. Uma izinyanga zifuna ukungena enkolweni azisho izizathu kodwa zingaziqhathanisi nabefundisi.
Esithangamini ebesibizwe yiKhomishini muva nje, uNkk Mkhwanazi-Xaluva uthe abelaphi abaphonsele inselelo uhulumeni uma bezibona benelungelo lokuba ngaphansi kwezenkolo ukuze baphathwe njengaholi bezenkolo.