ULundi luphume phambili ngokwakha imixhaso
UMKHANDLU wasoLundi uhlabane ngomklomelo wokuba umasipala ohamba phambili esifundazweni iKwaZuluNatal kumaGovan Mbeki Awards emkhakheni wokwakhiwa kwezindlu zomxhaso ezindaweni zamakhosi.
Lo masipala uphinde walala isibili esifundazweni ekukwazini ukuqhuba izinhlelo zentuthuko kodwa ube ungaxhasiwe. ULundi manje selizomela isifundazwe emcimbini kazwelonke wamaGovan Mbeki, okusazomenyezelwa ukuthi uzoba nini.
IMeya yoMkhandlu wasoLundi uMnuz Wilson Ntshangase ithe le mpumelelo isho ukuthi umasipala wabo uphethwe kahle.
Uthe bayishayela ihlombe impumelelo yabo, wabonga abasebenzi nezikhulu zikamasipala ngokusebenza ngokuzikhandla.Uphinde watusa nemfundiso yomholi we-IFP inkosi Mangosuthu Buthelezi, wathi nayo iyisisekelo sempumelelo yabo.
“Okunye okusisiza kakhulu imfundiso kaMntwana waKwaPhindangene, ngoba nathi sibukela kuyena ukuthi kuphathwa kanjani, amagalelo oMntwana ayazikhulumela njengoba aphatha uhulumeni waKwaZulu wenza izinto eziningi uhulumeni okhona manje ongakakwazi ukuzenza,” kusho uNtshangase. UNtshangase uthe uLundi lwaluyihlathi kodwa ngobuhlakani bukaButhelezi wakwazi ukuliphendula idolobha elisemakhaya kodwa elihlonishwayo. Uthe iyodwa indlela abangamhlonipha ngayo uButhelezi ukuthi banqobe ukhetho lapha KwaZulu-Natal ngonyaka ozayo.
Unxuse abantu ukuba baqhubeke nokubathemba ngevoti labo.
Uthe banezinhlelo eziningi asebezenzile baziqede ezidle izigidi kubalwa ukwakhiwa kwamahholo ezindaweni ezahlukene, imigwaqo nokufakwa kukagesi. “Nemigodi ebikhona edolobheni lethu okuke kwabikwa ngayo kwabezindaba sesiyivalile.”