Bavalele ngaphandle othisha becikwa ubugebengu
BAVALELE othisha nabafundi abazali baseMzwamandla Khanyile Primary, KwaDabeka abathi bafuna onogada kulesi sikole. Laba bazali babafundi bathi lesi sikole esineminyaka emihlanu sakhiwe sesigqekezwe izikhawu eziningi kwebiwa impahla yesikole entsha futhi ebizayo.
Omunye wabazali, abebevale amasango nongathandanga ukudalulwa, uthe bafuna ukuthi umphathi wabahloli afike esikoleni azozibonela ngoba babona sengathi umnyango uzithele ngabandayo ngokugqekezwa kwalesi sikole.
“Kusanda kwebiwa ithange lamanzi, amakhompyutha nezinye izinto ezibizayo. Kungani umnyango ukwazi ukuthi ukhiphe imali eningi kangaka ulungisa isikole kodwa wehluleke ukuqasha onogada abazoyiqapha?” kusho yena.
Uqhube wathi bengabazali behlulekile ukuhlanganisa imali yokukhokhela unogada.
“Sizamile ukuhlangabezana naye ngokuthi kwenziwe uhlelo lokuthi nakuba kungakhokhwa esikoleni kube nemali esiyikhokhayo enguR10 kodwa akulungi ngoba iningi labazali aliyikhokhi,” kusho yena.
Okunye athe kuyenziwa ukuthi baqashise amasonto angenazo izindlu zokukhonzela ngamasonto kodwa leyo mali isiza ekukhokheleni othisha nomabhalane abakhokhelwa ngabazali.
“Umhloli sike saludingida naye lolu daba phambilini kwanhlanga zimuka nomoya, yingakho sithi sifuna omphethe,” kusho yena. UNksz Slindile Matubatuba ilunga lesigungu esilawula isikole, uthe bathathe isinqumo sokuvala amasango ngoba bese bekhathele ukukhuluma nomhloli ngalolu daba kodwa ebatshela ukuthi imali ayikho.
“Isikole sethu asiziphatheli imali, imali esiyitholayo iyabalulwa ukuthi eyokwenzani. Umhloli wathi asizame ukuthola imali ngezinye izindlela. Sizame ukuthi abazali banikele ngoR10 ngenyanga kodwa akuphumelelanga, iningi labazali alisebenzi liyehluleka ukukhokha kwayona leyomali encane,” kusho yena.
UMnuz Kwazi Mthethwa okhulumela uMnyango wezeMfundo KwaZulu-Natal, unxuse abazali ukuthi balandele imigudu efanele yokufaka izikhalo.
“UNgqongqoshe walo Mnyango, uMnuz Mthandeni Dlungwane wasungula amathimba asombulula izinkinga ezifana nale ezifundeni. Abazali abaye emahhovisi esifunda bakhulume nomphathi uzobahlanganisa naleli thimba. Asifisi ukuthi kube nokuphazamiseka ezikoleni njengoba sekuzoqala izivivinyo,” kusho yena.