Bamiselwa ukulwa nenkohlakalo: ubufakazi
ABASEBENZI beSouth African Revenue Services (SARS) ababevimba ukuthi kungene ugwayi womkokotelo notshwala obungekho semthethweni bamiselwa ukulwa nenkohlakalo.
USihlalo wekhomishini ephenya ngenkohlakalo eSARS, iJaji Robert Nugent, utshelwe lokhu elalele ubufakazi.
NgoLwesithathu uMnuz Yousuf Denath, isikhulu esiphethe uphiko oluphenya ngabakhwabanisayo eSARS, uveze lezi zindaba ngesikhathi efakaza phambi kweJaji uNugent onguSihlalo weKhomishini.
Uthe iSARS yayisetshenziswa ngabathile ukufeza izinhloso zabo besizwa ngowayengukhomishana wayo, uMnuz Tom Moyane.
UDenath uthe ngoMashi 2016 uMoyane wasungula uphiko lwakhe olwalubhekelele izindaba zikagwayi yize lwaluvele lukhona uphiko olubhekelele lokhu.
“Abantu ababesebenza ophikweni olusha babesebenza nami belwa nenkohlakalo kodwa banikwa izikhundla ezintsha banyuselwa nemiholo wuMoyane,” kusho uDenath.
Uthe uphiko lwalungalwi nenkinga yokushushumbiswa kukagwayi kodwa lwalenza okuphambene nemigomo yokusebenza kweSARS.
Uveze ukuthi kwakunzima ukusebenza ngaleso sikhathi ngoba kwaze kwaba nebhuku elibhalwa ngaye esolwa ngokuthi usebenzisana neziqumama ezishushumbisa ugwayi ngoba efuna ukucindezela indodana yowayengumengameli wezwe, uMnuz Jacob Zuma, u-Edward nomuntu eyayisebenzisana naye uMnuz Yusuf Kajee.
“Kwathiwa angiphenywe wuMnuz Goby Makhanya osebenza ophikweni olubhekelele izikweletu kwaSARS eThekwini. Ngathathelwa i-laptop yami eyayinobufakazi benkohlakalo eyayithinta ngisho izikhulu zakwaSARS. UMakhanya wabucima bonke lobu bufakazi kwathi emuva kwalokho wanikwa isikhundla sokuphatha abaphenya ngokukhwabanisa,” kusho uDenath.
Uthe amaphoyisa awazange amphenye kodwa uphiko lwezabasebenzi kwaSARS lwalulokhu luthi unecala.
Uveze ukuthi iSARS yasebenzisa uR3 million izama ukumxosha kodwa ekugcineni iCommission for Conciliation, Mediation and Arbitration (CCMA) yamvuna. U-Adv Carol Steinberg ohola ubufakazi kwikhomishini uveze ukuthi iSARS yasebenzisa uR4 million ikhokhela abameli ukuze bashushise izikhulu zayo kodwa yagcina ihluliwe kulawo macala.
UDenath uthe akusiye yedwa owahlukumezeka kodwa ozakwabo nabo bamiswa emsebenzini ngokuphenya abashushumbisa ugwayi womkokotelo notshwala.
Phakathi kwabo ubale uMnuz Kumaran Moodley athe wamiselwa ukwenza umsebenzi wakhe.
Iyaqhubeka ikhomishini kaNugent.