Luya kumphathi omkhulu olukaFata wezigigaba
LUYA kumphathi omkhulu wamaRoma, uCardinal Wilfrid Napier, udaba lukaFata wase St Michaels eNdonyane, eHighflats osolwa ngokuhluleka ukuphatha ngendlela amalungu ebandla kule ndawo.
Amalungu aleli bandla asola uFata Vusi Sokhela ngokushaya imithetho emisha esindayo, amalungu angahambisani nayo.
Usolwa ngokuphoqa amalungu ebandla ukuthi akhokhe oR300 wokubusiselwa izimoto, iminikelo engengaphansi kukaR1000 nokunye okuningi.
“Siyile esigodlweni samaRoma eMariannhill kodwa umhlangano wagcina ungaqhubekanga,” kusho umthombo.
Ngokomthombo, kube nesivumelwano sokuthi abamele amalungu ebandla bazophinde babizwe ukuze kuqhutshekwe nomhlangano wokubhunga ngalolu daba lokuziphatha kuka Sokhela.
“Simtshelile umbhishobhi (Mlungisi) Dlungwane ukuthi sizolinda izinsuku ezimbili ukuthi asazise ukuthi umhlangano unini, ngale kwalokho sizothatha ezinye izinyathelo,” kugcizelela umthombo.
Amalungu aleli bandla afuna uSokhela achithwe ekubeni uFata waseSt Michael’s. UDlungwane uphinde wakugcizelela ukuthi zonke izintambo uzishiye kuFata Alexius Madela ukuthi kube uyena osingatha lolu daba.
Ethintwa kuleli sonto uFata Madela, uqale wathi akuxhunyanwe namalungu ebandla apotshozele leli phephandaba lolu daba ngoba azwakala sengathi azazi kangcono izindaba ezithinta leli bandla noFata walo.
“Besibalindele ukuthi bafike ngo-2 (ntambama) namhlanje (ngoLwesibili) kodwa bangafika,” kusho uMadela.
Abamele amalungu ebandla bakuphikisile ukuthi bazisiwe ngomhlangano uMadela athe bebebalindele ukuthi bafike kuwona ngoLwesibili.
Ngokwalawa malungu, abaphathi babukeka bevikela uSokhela esikhundleni sokuvikela ibandla.
Ngenkathi leli phephandaba lithinta ihhovisi likaNapier izolo, obambe ucingo uthe usaphumile.
Wethembise ukuthi uzomnikeza iminingwane yombhali wodaba uma esebuyile ukuze aphawule ngodaba.
Selithintwa okwesibili leli hhovisi, izingcingo zakhona besezikhala zingabanjwa muntu, zithi akushiywe imilayezo.
Imilayezo eshiywe kulezi zingcingo igcine ingaphendulwanga kwaze kwashaya isikhathi sokushicilela.
Kwenzeka konke lokhu nje, sekuphele amasonto amathathu amalungu aleli bandla engenzelwa iMisa.
Njalo ngamasonto abazalwane bavuka bayothandaza baphinde babhikishe emasangweni aleli bandla eHighflats ngoba ethi amfuna ehambile uSokhela kule ndawo.
Selokhu kwaqubuka lolu daba, uSokhela akaziphenduli izingcingo uma ethintwa, nemiyalezo athunyelelwa yona akayiphenduli.