Uphinde wahlehla owomgubho woweLembe
USUPHINDE wahlehla futhi uMkhosi weLembe obekulindeleke ukuthi ube seMoses Mabhida Stadium eThekwini ngeSonto.
Umkhosi wokuhlonipha iLembe uShaka kaSenzangakhona usuzoba ngo-Okthoba 7, ngeSonto elizayo kuyona futhi le nkundla.
Isimemezelo sikhishwe nguNdunankulu weSilo nesizwe sikaZulu uMntwana wakwaPhindangene esithangamini nabezindaba eThekwini izolo.
Sekungokwesibili umkhosi uhlehla njengoba bekulindeleke ukuthi ube ngoSepthemba 23, kodwa wahlehliswa kulandela ukudlula emhlabeni kwezinyane leSilo uMntwana uButho.
UButhelezi uthe ukholwa wukuthi umcimbi uzoqhubeka noma iykanjani ngeSonto elizayo njengoba kuhleliwe.
“Njengoba ngilapha nje ngixhumanile neSilo noNdunankulu wesifundazwe uMnuz Willies Mchunu mayelana nosuku olusha lo mcimbi, ngikholwa wukuthi manje akusekho okuzophazamisa,” kusho uButhelezi.
Uthe konke kudalwe wumshophi ovele ngesonto eledlule endlunkulu oholele ekutheni kuhlehle umcimbi.
“Ukuze sinikeze indlunkulu isikhathi sokuthi izile nenhlonipho, kuphoqeleke ukuthi umcimbi siwuhlehlise, kodwa sizibhekile futhi ezinye izinto ebezingaphinde ziphazamise umcimbi kwaphoqeleka ukuthi siphinde sithathe isinqumo esinzima,” kusho uButhelezi.
UButhelezi uthe ukumiswa kokusebenza kwezitimela uPrasa kuphazamise isifundazwe sonke.
“Okwamanje akucaci ukuthi isinqumo sokumiswa kwezitimela singaguqulwa nini, okwenza ukuthi kube nzima kwabafuna ukuza eThekwini emgubhweni weLembe,” kusho uButhelezi.
Uthe ngemuva kokuxoxa okunzulu neSilo sibalule ukuthi kumele bacabangele abafuna ukuza emkhosini.
“Okwamanje kuyacaca ukuthi kuzobe kungekho sitimela esizokwazi ukuthutha abantu ngempelasonto,” kusho uButhelezi.
Uthe kodwa bathathe isinqumo sokuthi umcimbi owenziwa amakhosi aseNdlunkulu njalo ngemuva koMkhosi weLembe wona uqhubeke ngeSonto eNsingweni eMthunzini njengoba bekuhlelilwe.
“Amakhosi azithathela isinqumo sokuthi enze umcimbi wawo njalo ngemuva koMkhosi weLembe. Umcimbi awenza ngemali azihlanganisela yona yingakho sibone ukuthi ukuwuhlehlisa nawo kuzoqhubela izindleko okuvele sekungenwe kuzona,” kusho uButhelezi.
Uthe usuku lwembizo kaZulu lusazomenyezelwa.