Ukhathazwa wukungalashwa kwabaphethwe yisifo sezinso
UDOKOTELA oqale umkhankaso wokuhlola abaphethwe yisifo sezinso uthi kuyamkhathaza ukungelashwa kwabagulela ukufa ngenxa yazo.
UDkt Nomfundo Dzingwa, oyiCorporate Health Physiotherapist onenhlangano ezimele iDzimend, uthe abaningi babulawa yizinso ngoba bengazihlolelanga kusenesikhathi kodwa zibe zilapheka. Abamnyama abanalo ulwazi ngesifo sezinso okwenza sibahlasele kakhulu. UDkt Dzingwa, ophinde abe nohlelo lokusiza abaphila nezinso, usehambela imiphakathi ukukhuthaza ukuthi ihlolele lesi sifo, afundise nangaso.
“Abantu abazi ukuthi izinso ziyalapheka baze bathole sekonakele kakhulu. Kunzima uma umuntu ethole esegulela ukufa ngoba akabe eselapheka kahle. Usuke esedinga ukwenza i-dialysis (ukuhlanzwa kwezinso), nayo okungelula ukuthola usizo lwayo. Inkinga esibhekene nayo kuleli wukuthi asebegulela ukufa ngenxa yezinso abalutholi usizo lwe-dialysis uma benezinye izifo okubalwa kuzo igciwane lengculazi nesifo sohlangathi. Kumanje sisazama ukulwela ukuthi nabo basizakale,” kusho uDkt Dzingwa.
Uthe usecelwe yiLegal Resources Council ukuthi basebenze nayo ukulwela labo abangalashwa. Zimbili izinhlobo zedialysis – kukhona eyenzelwa esibhedlela naleyo umuntu azenzela yona ekhaya njalo emuva kwamahora amane. Inkinga ngeyasekhaya wukuthi kunemicikilisho edinga ukuthi kuvakashelwa ikhaya ukubheka ukuthi lisesimeni esinjani. Abaningi bayachithwa emuva kokuvakashela emakhaya abo, okwenza bangakwazi ukuyithola i-dialysis.
“Uma umuntu esechithiwe kweyasekhaya kudingeka aye esibhedlela, abanye abasuke sebegula kakhulu bengakwazi nokuzihambela. Abanye bagcina bengasayenzi ngoba kunzima ukufinyelela esibhedlela, beshoda nangemali. Kungiphatha kabi ukubona umuntu esegulela ukufa kunzima nokumsiza,” kusho uDkt Dzingwa.
Mayelana nomkhankaso wokuhlola emiphakathini uthe usizana nenhlangano elwa nomdlavuza, iPink Drive. NgoMgqibelo bazobe besezinkundleni zemidlalo e-Ashley, ePinetown, lapho bazobe behlolela khona. Kuzoba khona nabe-Animal Rescue nabo abakhona emkhankasweni, kukhona neFlea Market kusukela ngo-9 ekuseni.
Uthe ukhuthaza ukuthi bonke abantu basheshe bahlolele izinso, ikakhulukazi abanoshukela, umfutho wegazi ophezulu ngoba yibona abasengcupheni. Abanye athe basengcupheni yilabo abanezihlobo ezinenkinga yezifo eziphathelene nezinso. IKHASI ELIKHOKHELWE