Kuqwashiswe ngokungezwa
BAFUNA ukukhuluma ngezandla kuhlonishwe ngokulingana njengezinye izilimi zakuleli abangezwa, abakhankasela ukuthi kufundelwe nasemanyuvesi.
Bakusho lokhu izolo behlangene emkhankasweni wokuqwashisa ngokungezwa eChesterville eThekwini, ogxile nasekufundiseni ngokubaluleka kokukhuluma ngezandla.
UMnuz Trevor Ngcobo onguSihlalo weSouth African Sign Language National Body, uthe bambalwa abaqeqeshelwe ukufundisa ukukhuluma ngezandla. Uthe lokhu kufaka enkingeni abangezwa, abangakwazi ukusizakala ngisho ezikhungweni zikahulumeni.
“Ukukhuluma ngezandla kuwulimi kodwa kubukelwa phansi. Ngisho laba abakufundisayo abaqeqeshekile kahle, okwenza abangezwa basale ngaphandle. Kumele ngabe yonke indawo lapho kusizwa khona umphakathi kunabantu abakwazi ukukhuluma ngezandla. Njengoba wonke umuntu enelungelo lokusizwa ngolimi aluzwayo, kumele nabangezwa banikwe lelo thuba,” kuchaza uNgcobo.
Uphakamise ukuthi kube nesikhungo esizoqeqesha ukufundela ukukhuluma ngezandla ukuze zonke izinhlaka zomphakathi zibe nabo.
UNkk Odette Swift onguMqondisi weDeaf Education SA, uthe abangezwa basabukelwa phansi futhi balawulwa yilabo abezwayo. Uthe bashiywa ngaphandle ngisho kwenziwani emphakathini.
“Inkinga enkulu ukuthi bambalwa kakhulu abangezwa abafundiswe ukukhuluma ngezandla. Lokhu kwenza ukuthi basilele emuva bangaqasheki ngisho ezikhundleni eziphezulu. Siyajabula ukuthi kulo nyaka kuno-matric wokuqala ozohlolelwa ukukhuluma ngezandla kodwa lokhu akwanele. Kumele okungenani ngonyaka wokuqala ezikhungweni zemfundo ephakeme kube nesifundo sokukhuluma ngenzandla. Bonke abasebenzi bakahulumeni nasezinkampanini ezizimele kumele bakwazi okungenani ukukhuluma ngezandla okulula,” echaza.
Uthe kade benze imihlangano namaphoyisa nabasebenzi bezempilo benxusa ukuthi bafundwe ukukhuluma ngezandla ukuze bakwazi ukusiza abangezwa. Uveze nokuthi bahlela ukumashela emahhovisi oMnyango wezeMfundo esifundazweni ukuze bagqugquzele ukuthi kufundiswe ulimi lwabo nasezikoleni.
UNkk Swift ukhale ngokuthi okwenza izinselelo zingapheli kwabangezwa ukuthi nezinhlangano zabo azinayo imali ngoba azinakiwe.
UMnuz Ayanda Nene obemele iKhomishini yamaLungelo Abantu uthe bazokwenza konke okusemandleni ukweseka abangezwa ukuze kuhlonishwe amalungelo abo. Usuku lwangoLwesithathu beluyingxenye yokuqwashisa ngokungezwa njengoba kuyinyanga yakho.