Inkinga yezitimela idinga ukusukunyelwa ngokushesha
KUPHINDE kwamiswa ukusebenza kwezitimela KwaZulu-Natal ngenxa yokushiswa kwesiteshi sesitimela saseMlaza. Abagibeli abashise isitimela bebethukuthele ngenxa yendlela izitimela ezisebenza ngayo.
Ukungaboni ngaso linye phakathi kwabagibeli bezitimela nenkampani eyengamele izitimela, iPassenger Rail of South Africa (Prasa) yinto esineminyaka ikhona. Abagibeli bahlale besola iPrasa ngokungawenzi ngendlela umsebenzi wayo njengoba bethi ukusebenza kwezitimela akuthembekile, zivamile ukungasigcini isikhathi.
Izitimela okukhalwa ngazo kakhulu ezisuka emalokishini ziya edolobheni nokuyizona abagibeli abathembela kuzona ukuya emsebenzini. IPrasa iyaye izithethelele ngokuthi nayo inezinselelo enazo kodwa izama ngokungangamandla ayo ukwenza umsebenzi ngendlela. Akuqali ukuthi abagibeli bazwakalise ilaka labo ngokucekela phansi ingqaqalasizinda. Njengoba siyaye sisho, asisoze savuna umuntu okhetha ukusebenzisa udlame ukulwa izimpi zakhe, ngakho lokho okwenziwa ngabagibeli akwamukelekile futhi kufanele uma kukhona abangaboshwa ngalesi senzo baboshwe.
Ukucekela phansi impahla ngeke kushintshe izinto, kunalokho kuzenza zibhede kakhulu njengoba njengamanje izitimela zimisiwe nosekuxaka bona abagibeli osekufanele bathole ezinye izindlela zokuya emsebenzin. Okubi futhi ngokucekela phansi ingqalasizinda ukuthi kudalela uhulumeni izindleko asuke engazihlelele nokusho ukuthi kukhona imali okufanele ngabe isetshenziselwa ukufeza ezinye izidingo kodwa egcina isifakwa ekukhandeni izitimela nasekuthengeni ezintsha. Besephutheni benjalo abagibeli kodwa kuyadingeka iPrasa izinuke amakhwapha ngendlela eyenza ngayo izinto futhi izibuze ukuthi iyabahlonipha ngempela yini abagibeli njengamakhasimende abo.
Sekuyiminyaka kukhalwa ngento eyodwa, hhayi KwaZulu-Natal kuphela kodwa nakwezinye izifundazwe, abagibeli bezitimela bakhala esifanayo.
Kuyadingeka noMnyango wezokuThutha owengamele le nkampani uke ubhekisise, ukhuculule, badede abantu abahlulwa umsebenzi.
Ukungawuhloniphi umsebenzi kwabasebenzi bePrasa kubeka imisebenzi yabagibeli bezitimela engcupheni.