Asizame ezinye izindlela kuliwe nalobu bugebengu
Sibusiso Khumalo EZAKHENI MHLELI: Iyamangaza indlela abantu bakithi ababulalana ngayo. Mihla namalanga kubikwa izigameko zokufa kwabantu bebulawa abanye abantu. Okufike kushaqise kakhulu ukubandakanyeka kwentsha ezigamekweni zokubulala.
Kuyadumaza ukubona intsha yakithi esikhathini lapho izwe selibuswa ngentando yeningi nodlame lwezombusazwe lungasekho kodwa intsha yakithi ichitha igazi labantu mihla namalanga.
Isibindi sokugwaza ubulale omunye umuntu sivelaphi sizwe sakithi? Lezi zibhamu ezigcwele izwe lonke okubanjwa ngazo inkunzi, zona zivelaphi? Sifike kanjani la sizwe sakithi? Ngabe asenzi kahle emakhaya, ezikoleni, emabandleni nasemphakathi? Ngabe uhulumeni wethu uyehluleka ukunqanda ubugebengu?
Kumele size sibulale bani isibhamu ukuze uhulumeni ezophuma umkhankaso wokuqoqa izibhamu ezingekho emthethweni? Izwe liyadunguzela ngenxa yegazi labantu eligobhoza mihla namalanga.
Inkulu le nkinga idinga amadoda nomama abaqotho idingidwe kuphunywe nekhambi lokuqeda lesi sihlava. Ukuba kuya ngami ngabe kuqala ngokuvalwa wonke amathoyizi ezibhamu ngoba izingane ziqala lapho ukwazi ukuthi kunento okuthiwa yisibhamu, bese kuzoba imidlalo yakuthelevishini, ukuba kuya ngokwami ngabe awukho nowodwa umdlalo onodlame ovunyelwa ukukhonjiswa kuthelevishini.
Singaqala manje sakhe isizwe esingenalo udlame ngokubambisana nohulumeni nazo zonke izinhlaka zemiphakathi esiyakhele.
Kucace bha ukuthi lincane iqhaza elidlalwa amajele ekulweni nobugebengu, kumele sizame ezinye izindlela zokubumba isizwe esingenalo udlame nobugebengu. Nathi Cele KWADUMISA EMZINTO