URantie angase agijime kwiMTN 8 Final
IPHINI lomqeqeshi kwiCape Town City FC,uVasili Manousakis, lithembise abalandeli bebhola baseNingizimu Afrika ukuthi nakanjani umgadli omusha weqembu, uTokelo Rantie, uzobonakala eMoses Mabhida Stadium, eThekwini, kusasa.
ICity izotholana phezulu neSuperSport United kowamanqamu weMTN 8, emdlalweni ozoqala ngo-7 kusihlwa. UManousakis uthe noma engeke aqinisekise ukuthi uRantie uzowuqala yini umdlalo kodwa basezinhlelweni zokuthi abonakale eMabhida kusasa. URantie uthengwe iCity ngasekupheleni kwenyanga edlule, ngemuva kokushiya kwiGenclerbirligi yaseTurkey.
Kuze kube yimanje ubengakadlali kuleli qembu laseKapa.
“Isimo sikaRantie okwamanje sisazama ukusilungisa. Simfake ohlelweni lapho khona sifuna ukuthi alunge kahle ngokomzimba, lokho kusho ukuthi kufanele sisiqaphele isimo sakhe. Nokho sifuna ukumfaka esikwatini esizobe sidlala lapha eThekwini kowamanqamu.
Noma lokho kungasho ukuthi akazudlala, noma kungasho ukuthi uqala ebhentshini, noma adlale imizuzwana ewu-20. Ngiyazi ukuthi ithimba labaqeqeshi, abaphathi nabadlali bafuna ukuthi abe yingxenye yeqembu, ngakho ngingathi nje siyethemba ukuthi uzoba khona,” kuchaza uManousakis etshela izintatheli izolo eMabhida. ISuperSport iyishayile iCity kowamanqamu emqhudelwaneni ofanayo ngesizini edlule. Nokho kulokhu, iCity ithembisa ukuziphindiselela. “Kwakufanele senze kangcono ngesikhathi sesihamba phambili ngo 1-0 kowamanqamu. Nokho sagcina sikhale ngaphansi ekugcineni ngenxa yamaphutha. Umqeqeshi wethu (uBenni McCarthy),ungumnqobi. Lapha sikhuluma ngomuntu osenqobe isicoco se-Uefa Champions League, okungeyona imvula enetha noma ngubani. Siwalungisile amaphutha ethu, futhi sifuna ukusinqoba lesi sicoco,” kuqhuba uManousakis. Ziya kulo mdlalo nje, iSuperSport isazikhotha amanxeba kwazise ngasekuqaleni kwesizini ithole isibhaxu sika 2-0 ishaywa iyona belu i-The Citizens emdlalweni we-Absa Premiership. UGodfrey Mosoetsa oyiphini lomqeqeshi kuMatsatsantsa a Pitori uthe uthembele kwisipiliyoni sabadlali bakhe, ababize ngomakadebona. “Ngicabanga ukuthi ngesikhathi besishaya ngo 2-0 ngasekuqaleni kwesizini kuningi ebesisakuhlanganisa nomqeqeshi uKaitano Tembo. Ngingasho ngithi konke manje sekuhlangene. Sinabadlali asebedlale kweyamanqamu iminyaka eminingi futhi asebeke badlala ezigabeni eziphezulu kunobhutshuzwayo. Angingabazi ukuthi iCity izosinika umdlalo onzima kodwa iqiniso ukuthi isipiliyoni ngeke usithenge ndawo,” usho kanje uMosoetsa izolo. Phakathi kwabadlali uMosoetsa abekhuluma ngabo, kukhona uReneilwe “Yeye” Letsholonyane, Dean Furman, Bongani Khumalo noMorgan Gould ukusho abambalwa.