Usazimisele ngokulwela ijezi oweZimnyama
USAZIMISELE ngokulwela indawo yakhe esikimini esikhulu se-Orlando Pirates umdlali wasesiswini,u-Abel Mabaso, osedlaliswa eqenjini leMultichoice Diski Challenge (MDC).
UMabaso, waKwaNdengezi, KwaZulu-Natal,ujoyine iPirates ngasekuqaleni kwesizini esuka kwiChippa United ehambisana noLinda Mntambo noPaseka Mako abeyibamba nabo kwiChilli Boys. Nokho kuze kube yimanje akakaze aligqoke ijezi eqenjini eliphekwa wuMilutin “Micho” Sredojevic.
Emasontweni edlule kusabalale izinkuluno zokuthi,uMabaso, angase abolekiswe ngenxa yobuningi babadlali abadlala endaweni yakhe. Enkabeni yenkundla kweZimnyama kukhonya uXola Mlambo noBen Motshwari okwamanje.
Eminyakeni edlule,uMabaso ubengumdlali weMamelodi Sundowns kodwa wathwala kanzima ukuthola indawo esikimini sekufike umqeqeshi uPitso Mosimane. Ugcine ephila ngokubolekiswa emaqenjini ahlukene, kwaphetha ngokuthi kuhlukane inhloko nesixhanti namaBrazilians.
“Akukho okusha kimina ngokuba lapha eGauteng ngoba ngike ngadlala khona, indawo ngiyayazi. Ngifuna ukungena esikimini nokulwela ijezi ukuze ngiqinise iqembu elikhulu. Umbango wezindawo muhle kakhulu, usigcina sonke sisebenza kanzima ukuze kuhlomule iqembu. Ngicabanga ukuthi yilokho okubaluleke kakhulu,”kusho uMabaso.
Kusukela eqale ibhola esigabeni esikhokhelayo uMabaso usedlale izindawo eziningi okukhona kuzona nasemuva kwesokudla. Nokho iPirates imsayinise njengomdlali wasenkabeni yenkundla okuyindawo abekade eseyidlala kwiChippa.
Emuva kokuyiqala kabi isizini ka-2018/2019, iPirates ikwazile ukuqoqa amaphuzu emidlalweni yakamuva. Kumanje iPirates iyona ehlezi esicongweni se-log ye-Absa Premiership ngamaphuzu awu-14 emuva kwemidlalo eyisishiyagalombili.
“Kimina iqembu lihamba phambili. Noma yikuphi lapho ngidingeka khona ukuthi ngisize iqembu ngizodlala khona. Noma ngabe kusemuva noma kusesiswini. Okubalulekile ukuthi uma ngithola ithuba ngidlale ngokuzinikela,”kusho uMabaso.
“Sisebenza kanzima ejimini ukwenza isiqiniseko sokuthi iqembu lenza kahle. Iligi iwumjaho. Ngakho kufanele siqhubeke sibheke nendlela esenza ngayo. Kuhle ukubona bonke abadlali benza kahle.”
Emdlalweni olandelayo wePirates kwi-Absa Premiership izobhekana neLamontville Golden Arrows e-Orlando Stadium, ngoOkthoba 3.
KwiMDC izobhekana neBloemfontein Celtic eDr Molemela Stadium ngo-Okthoba 6.