I-Honda HR-V ethuthukisiwe
NGESIKHATHI abakwaHonda belungiselela ukwethula kwabezindaba i-Amaze entsha emasontweni amabili azayo eKapa, balethe iHR-V ethuthukisiwe emakethe yakuleli.
Le crossover bayishintshile izinto ezithize ukuze izoheha kumakhasimende. Empeleni ngokwezibalo iHR-V yiyona moto edayise kakhulu emndenini wakwaHonda eNingizimu Afrika ngenyanga eyedlule njengoba kudayiswe angu-152. Selokhu yafika ngo-2015 yenza kahle emakethe.
Lena ethuthukisiwe yakhelwe phezu kwesisekelo sendala futhi isahlukene ngezinhlobo ezimbili, okuyiElegance neComfort.
Ushintsho olwenziwe ngaphandle luhlanganisa ingaphambili elisha elifana nezimoto zakamuva zakwaHonda. Inobhampa omusha kanjalo namalambu akhiwe ngenye indlela nobhampa.
Amalambu ahlanganisa naweLED kanjalo namaLED daytime running lights kwi-Elegance kuthi kwiComfort kube najwayelekile.
Ngemuva bayithinte lapha nalapha emalambini nalapho kuhlala khona i-number plate.
IComfort yona isahamba ngawo amasondo anamarimu angu-16 inch kanti i-Elegance yona bayigaxe amasha angu-17 inch.
Ngaphandle kwalokhu baphinde bengeza nemibala emisha okungobomvu iPassion Red noluhlaza okwesibhakabhaka abawubiza ngoBrillian Sporty Blue.
Ushintsho alugcinanga kuphela ngaphandle kodwa nangaphakathi lukhona abalwenzile. IComfort bayishintshe izindwandu kanti i-Elegance yona ishaya ngesikhumba.
Izinto ephuma nazo zihlanganisa amawindi kagesi nezibuko, remote central locking, air-conditioning, cruise control isiteringi esinamabhathini kanjalo nemulti-information trip computer.
Okunye abakwenzile wukushintsha i infotainment system eyi-touchscreen etholakala kuzo zombili. I-screen singu-6.8 inch kanti phambili iComfort yayiphuma nesingu-5 inch. I-infotainment system ihlanganisa iBluetooth, USB/HDMI nenkombandlela.
Kwi-Elegance kuphinde kuvele ingemuva uma uhlehla kwazise inekhamera.
Abakuqhakambisa kakhulu ngeHR-V yisikhala sayo kwazise yimoto yomndeni. Lokhu kungenxa yokuthi basebenzisa uhlelo abalubiza ngeMagic Seat System, eyenza ukuthi ithangi likaphethroli libe phakathi nendawo bese ingemuva phansi lindlaleke. Ibhuthi lingu-393 litres kodwa uma usugoqe izihlalo liba ngu-1 002 litres.
Izihlalo zangemuva uyakwazi ukuziqukula futhi kuphinde kwande isikhala sempahla. Izinjini nezokuphepha
Ushintsho alwenziwanga ezinjinini njengoba kusekhona ezimbili. Zonke zisebenzisa u-gearbox oyiCVT onamagiya ayisikhombisa futhi kukhona ama paddle shift ukuzishintshela uma uthanda.
Ethwala iComfort injini ingu-1.5 litre enamandla angu-88 kW ne-torque engu-145 Nm. Bathi ngebanga lika-100km isebenzisa amalitha angu-6.3 kaphethroli.
Etholakala kwi-Elegance ingu-1.8 litre enamandla angu-105 kW ne-torque engu-172 Nm. Bathi isebenzisa amalitha kaphethroli angu-6.8 ngo-100km.
Ngakwezokuphepha iHR-V ifika nama-airbag ngaphambili, eceleni nama-curtain, amabhreki i-anti-lock brake system ne-Electronic Brake Force Distribution, Emergency Brake Assist ne-Emergency Stop Signal activation.
Iphinde ibe neVehicle Stability Assist, Hill Start Assist nendawo yokufaka isihlalo sengane. Amanani HR-V 1.5 COMFORT CTV HRV 1.8 ELEGANCE CVT
Iphuma ne-warranty yeminyaka emihlanu noma u-200 000km, i-service plan yeminyaka emine noma u-60 000km ne-AA roadside assistance yeminyaka emithathu. Kumele iye kwi-service ngemuva kokuhamba u-15 000m.