Yisicefe ukubuzwa ngokufa kwemoto
izophaphalaza ishayise udonga kwathi labababhemu abebebajaha beza nezinduku nezagila bayibhonya imoto yasala imabaqabaqa.
Kwakuzwakala njengehlaya lokho kodwa uma ulwazi udaba lwe “road rage” uzokwazi ukuthi kuyenzeka kuphume isidumbu futhi njengoba imoto yalomfokazi isinje, naye akakuthandi lokho kepha uphoqwa yisimo ukuhamba ngayo isiyinkamba beyibuza.
Iseluleko sama-hazard sicacile, futhi iningi labanikazi bezimoto bazongivumela, asipheze ukubuza le mibuzo ethi “usuyibulaleleni” noma “usuyishayiseleni imoto?”
Uma uzwelana ngempela nomuntu ombona ehamba ngemoto elimele kwenze ngesizotha kuzwa yena yedwa uqale ngokuthi uzwelane naye bese umeluleke ukuthi yikuphi lapho engalungeselwa khona kahle noma ngemali engambi eqolo.
Phela kuyisicefana ukubuzwa ukuthi ife kanjani imoto. Empeleni kuvusa amanxeba futhi kuvusa ushukela.
Nombuzo wukuthi inawo yini umshwalense ungawubuzi uma ungenazo izimpendulo ngoba njengoba izimoto zigcwele umgwaqo nje ezinye azinawo umshwalense ngenxa yokudula kwezinto, ngakho yiba yisoka uma weluleka ungagxeki.
Uma ubona ukuthi kube yiphutha lakhe umnikazi wemoto khombisa kucace ukuthi uyazwelana naye ngoba lixhoshwa libhekile induku ishaya imviki.
Yabona nje le moto yakithi inezibazi ezintathu ezimbili zazo zigqamile esinye siwumuhuzukwana.
Kwamina sengikhathele ukuchaza kubobonke abantu sengithandazela ukuthi ngithole amandla ngihambe ngiyoyikhanda ngokushesha ukuze abantu bapheze ukungibuza ukuthi kodwa ngiyishayiseleni imoto.
Okungcono ungabuza ukuthi yalinyazwa yini imoto hhayi indaba yokuthi ngiyilimazeleni. Futhi ungalokhu ubuzana nomuntu ukuthi uyishonisephi imoto ngoba ezinye zisuke zifile ezinye zidliwe amabhange kanti ezinye kuyenzeka sibambise ngazo kwamashonisa.
Ngakho umnikazi uba nenkinga sekufanele aqambe amanga athi uyidayisile kanti idliwe. Masilinde kube umnikazi oqala udaba bese sixhuma lapho, nalapho ungehluleli kakhulu.
Hhayi-ke asinake izindaba zethu sipheze ukufaka amakhala ethu nokwahlulela abanye abantu noma ngabe siyabona ukuthi babudedengu kodwa akudokwe eligayelwe thina lelo uma imoto kungesiyo eyakho phuma lapho.
Sesingawavala lana ama hazard ethu anamuhla siqhubeke nokushayela ngokubuswa yiyo yonke imithetho elawula ezemigwaqo ukuze siwelele ngokuphepha enyangeni ezothwasa ngesonto elizayo yezokuthutha u-Okthoba.
Uma ufisa siyiqhube lendaba ngena ekhasini lethu likaFacebook othi Igedlela lami with Sthembiso Shangase. Yimi owenu nali ikheli ngezansi hazardiso@gmail.com