Uchaze iningi umbukiso eMsinga
USMANGA Mabaso ongumgqumgquzeli womdlalo wezimoto waminyaka yonke iMsinga Driftkhana ebiseMphelakankani, eMsinga, ngempelasonto, uthe sebeqalile ngamalungiselelo omcimbi wangonyaka ozayo.
Lo mcimbi obekungowesikhombisa ukhona kulo nyaka uqale ngoLwesihlanu waze waphothulwa ngeSonto.
NgoLwesihlanu bekunomcimbi wamahlaya obekunandisa kuwo uFelix Hlophe, Nzuzo Cele nabanye. Kube sekuqhululwa umculo obudlalwa nguDJ Qhawe nabanye.
NgoMgqibelo kube wumcimbi omkhulu lapho bekudlalwa khona izimoto. Bekukhona abashayeli okubalwa kubo uMagesh Ndaba, Team Numbi, Team Lentja nabanye.
Abashayeli bebeshaya izidudla, behambisa izimoto ngohlangothi bephinde bechuthe emathayini abebekwe inkundleni nokuyinto ebichaza izethameli ebeziphume ngobuningi bazo.
Izithameli ziphinde zajatshuliswa wukubona izimoto zikanokusho ezingene enkundleni njengeBMW M4, BMW X6M, Mercedes-Benz G-Wagon, nezinye. Kuphenduke iMercedesBenz C63 kwahlanya abantu.
Ngemuva komdlalo wezimoto kube sekungena abaculi kwazise bese kuyi-after party. Phakathi kwabo kubalwa uDladla Mshunqisi, DJ Happy Gal, Sphectacula noDJ Naves, DJ Mngadi nabanye.
NgoMgqibelo kuphinde kwaphiwa imindeni ephethwe ngabafelokazi engu-50 igilosa.
NgeSonto umcimbi usongwe ngepool party obekudlala kuyo uDJ Qhawe, DJ Le Soul nabanye.
“Sijabule ngokuthi yonke into ihambe kahle. Kusukela ngoLwesihlanu abantu bebegcwele. Besizitshela ukuthi kuzofika idlanzana kodwa kusicacele ukuthi abantu bawuthandile umcimbi wamahlaya. Ngonyaka ozayo sizowubuyisa,” kusho uSmanga.
Uthe bafuna kushaye uJanuwari sebeqedile ngezinhlelo bese bebe beqala bekhangisa umcimbi njengoba bephumela ezindaweni ezingaphandle bemema abantu ukuthi bawuthamele.
“Sizoba nomhlangano sibheke ukuthi yikuphi lapho singenza kangcono khona bese siyalungisa futhi senze isiqiniseko sokuthi izinga liyanyuka ukuze abantu abebekhona basibone futhi nesidingo sokubuya. Siyabonga kubo bonke abaxhasi bethu ikakhulukazi umasipala wethu kanjalo nowesifunda,” kusho uSmanga.
Omunye wabahleli u-Arthur Mbhele naye uthe ujabule ngendlela umcimbi ohambe ngayo.
“Kuyangijabulisa ukuthi umsebenzi esiwenzile kusukela unyaka uqala uthele izithelo ezinhle.”