Basazohlupheka abagibeli bezitimela emzileni osenyakatho
BASAZOQHUBEKA nokuhlupheka abagibeli bezitimela basogwini olusenyakatho njengoba izitimela zizoqhubeka nokumiswa kulo mzila yize eminye imizila ivuliwe, namhlanje.
Kulo mzila ophela KwaDukuza ngeke zibuyele izitimela. AbakwaPassenger Rail Agency South Africa (Prasa) bathi lo mzila awuphephile njengoba kuke kwaba nezigameko zokushaywa kwabashayeli bezitimela uma kwenzekile zasilela emuva ngesikhathi.
Ukuhamba kwezitimela bekumisiwe KwaZulu-Natal kulandela ukushiswa kwesiteshi sesitimela nezimoto zabasebenzi eMlaza.
UMnuz Zwabesho Shange wohlaka lwabagibeli besitimela iCommuters Voice, uthe abenelisekile ngesinyathelo sePrasa.
“Emhlanganweni wangoLwesihlanu obudingida ngokuphepha ezitimeleni, uPrasa uthe lo mzila awuphephile. Kuyaxaka lokho ngoba lo mzila awukaze uvalwe kuthiwe kushaywa abashayeli bezitimela futhi awukho nombiko ocacile ochaza ngalezi zigameko. EMlaza lapho kade kushiswe khona isiteshi izitimela zizobuyela. Kuthiwa laba bagibeli abenze njani,” kusho uShange.
Uqhube wathi kwale ngisho echaza ngosizi oluzobhekana nabafundi abasebenzisa isitimela.
“Sekubalwa izinsuku kuqalwe ukubhala izivivinyo zikamatric, iPrasa ayikubhekeleli lokhu. Aseneme ngesinqumo ngoba sethembele kuzo izitimela, amatekisi ayabiza,”
UMnuz Zama Nomnganga okhulumela iPrasa KwaZulu-Natal, uthe kuzokwengeza onogada namaphoyisa emizileni ezovulwa.
UMnuz Mluleki Mntungwa okhulumela uMnyango wezekuThutha KwaZulu-Natal, izolo uthe ithimba lomnyango nabakwaPrasa bahlangene nomphakathi KwaDukuza.
“Sifuna ukwenza isiqiniseko sokuthi yonke imizila iphephile. Uma sekunesiqiniseko sokuthi kuphephile, umzila uzovulwa. Okwamanje asikazi uzovulwa nini,” kusho uMnuz Mntungwa.