IDA iphakamisa ukuthi isakazwe ikhomishini
IDEMOCRATIC Alliance (DA) ithi iSABC kufanele isakaze iKhomishini yeJaji uRaymond Zondo ephenya ngokulawulwa kombuso yidlanzana.
UNksz Natasha Mazzone, okhulumela iDA odabeni lokulawulwa kombuso yidlanzana, uthe ubhalele uSihlalo weBhodi yeSABC uDkt Bongumusa Makhathini emcela ukuthi iKhomishini kaZondo isakazwe bukhoma yiziteshi zethelevishini nezomsakazo zale nhlangano.
“Abantu baseNingizimu Afrika abangakwazi ukukhokhela iziteshi zethelevishini nabengenayo idata yokungena kwi-internet bathola imininingwane emincane ngeKhomishini kaZondo. Kubalulekile ukuthi abantu bazibonele ubufakazi obethulwa kwiKhomishini kaZondo ukuze baqonde inkinga yokulawulwa kombuso yidlanzana,” kusho uNksz Mazzone.
Uthe kubuhlungu ukuthi abantu bafunda imibiko efingqiwe emaphephandabeni ngekhomishini noma babone iziqeshana zayo uma kudlala izindaba kuthelevishini.
“Kubalulekile ukuthi umphakathi unikwe yonke imininingwane ethinta uhulumeni esiteshini sokusakaza sikahulumeni njengeSABC. Emasontweni azayo kuzofakaza ongqongqoshe okubalwa kubo oMnuz Nhlanhla Nene, Pravin Gordhan noNkk Barbara Hogan. Abantu baseNingizimu Afrika kufanele bazizwele ngezabo lobu bufakazi,” kusho uNksz Mazzone.
Uthe iSABC kufanele ikhombise ukuthi kungani abantu kufanele bakhokhele amalayisensi ethelevishini ngokubalethela iKhomishini kaZondo ngoba ukuxhashazwa kwemali kuthinta wonke umuntu.
Imizamo yokuthola abakwaSABC ukuthi baphawule ayiphumelelanga njengoba uNkk Neo Momodu obhekelele ezokuxhumana kuze kwashaya isikhathi sokushicilela engayiphenduli imibuzo athunyelelwe yona nge-sms nakwi-email.