Kuboshwe obesonqenqemeni eMabhida
KUBOSHWE indoda eyodwa ebingafuni ukwehla onqenqemeni oluhlukanisa inkundla yebhola nendawo yokuhlala abantu eMoses Mabhida Stadium.
Lesi sigameko senzeke ngoMgqibelo ebusuku ngesikhathi kuqhubeka umdlalo wamanqamu weMTN8 onqotshwe yiCape Town City ehlule iSuper Sport United.
Umphathi weMoses Mabhida Stadium, uMnuz Vusi Mazibuko, uthe bawu-30 000 abantu abathamele ifayineli yeMTN8 futhi lokhu kukhombisa ngokusobala ukuthi bayindawo ekahle yokwenza imicimbi emikhulu.
Ubuzile ukuthi kuzo zonke izinto ebezenzeka izolo kungani Isolezwe ligxile ekuboshweni kwalo mlisa ngoba abantu bebethokozela ukubuka ibhola enkundleni yemidlalo esezingeni eliphezulu.
Uthe indoda ithathe indwangu ebimboze izihlalo yazungeza unqenqema oluhlukanisa inkundla nendawo yokuhlala abantu.
“Umuntu akaboshelwanga ukungena enkundleni kodwa ubengakhuzeki ngesikhathi amaphoyisa emcela ukuthi akehle kulolu donga. Abantu akade ehamba nabo bawalalelile amaphoyisa yena uqhubekile wase eboshwa. Udedelwe ngesixwayiso,” kusho uMazibuko.
Uthe bebevele belindele abantu abaningi eMoses Mabhida Stadium ngenxa yokuthi nangonyaka odlule ngesikhathi kunomdlalo wamanqamu weMTN8 kwakufike abantu abawu-21 000.
“I-PSL izokuthola kunzima ukuyisa imidlalo emikhulu kwezinye izinkundla ngoba kuyacaca ukuthi siyakwazi ukuphatha yonke imicimbi. Siyilungele yonke imicimbi abantu abafisa ukuyenza eMoses Mabhida Stadium ngisho nayo ekamaskandi futhi ngiyathemba abathandi balo mculo babonile ukuthi silungele yonke imicimbi,” kusho uMazibuko.
Ugqugquzele abantu ukuthi baphume ngobuningi babo noma kudlala amaqembu aKwaZuluNatal kwazise bebephumile kudlala iqembu lasePitoli nelaseCape Town.
“Umdlalo wayizolo usikhombisile ukuthi abantu baKwaZulu-Natal bayalithanda ibhola, siyacela baphume ngobuningi babo uma kudlala amaqembu azinze esifundazweni sethu ngoba lokhu kuyasiza ekuthuthukiseni umnotho nasekuheheni eminye imicimbi emikhulu ukuba ize eThekwini,” kusho uMazibuko.