Basola amaphoyisa ngemali ebalahlekele
UKHALA ngamaphoyisa umndeni waseMakhilimba, eShowe, othi afika ezosesha, efuna izibhamu ezingekho emthethweni kodwa kwalahleka uR7 940 endlini.
UNkk Nelisiwe Dlamini uthe abazi ukuthi sekumele benzenjani nomyeni wakhe ukuze bathole imali abathi yathathwa ngamaphoyisa endlini.
UNkk Dlamini elandisa Isolezwe uthe ngo-Septhemba 26 kwafika amaphoyisa entathakusa efuna izibhamu ezingekho emthethweni.
“Kwangqongqoza amaphoyisa athi asivule nomyeni wami oyinduna kule ndawo. Ngoba siyawahlonipha amaphoyisa, umyeni wami wavula. Kwangena inqwaba yamaphoyisa ayegqoke umfaniswano kwathi uma sibuza ukuthi avelaphi amanye athi avela eMgungundlovu naseGoli. Athi afuna izibhamu ezingekho emthethweni. Angikhipha ekamelweni lami lokulala asala nomyeni wami. Amanye aphinde amkhipha amyisa emotweni yakhe,” kusho uNkk Dlamini.
Uthe ngaleso sikhathi kunamanye amaphoyisa asala ekamelweni labo wodwa.
Uthe kwabe sekuqhamuka elinye iphoyisa lathi akazobheka ukuthi akukho yini okonakele ekamelweni labo njengoba kade besesha.
“Ngafike ngabona nje ukuthi isisefo esihlala imali asisekho. SasinoR4 000 phakathi. Ngawatshela ukuthi isisefo asisekho lapho besisibeke khona. Sathi uma sibheka nase-tuck shop sathola ukuthi uR2 940 obubekwe khona awusekho. Nasesikhwameni somyeni wami kwakuno-R1000 nawo wawungasekho. Amaphoyisa avele athi ngoba siyawasola ukuthi athathe imali yethu kungcono ayoseshana wodwa ukuze abone ukuthi ihambe nobani imali. Ahamba angabe esabuya. Ayikho imali eyake yalahleka lapha ekhaya phambilini,” kusho uNkk Dlamini.
Uthe babe sebebikela amaphoyisa aseShowe kwavulwa icala. “Amaphoyisa aseShowe asitshela ukuthi awanalo ulwazi ngamaphoyisa abethunywe kwaDlamini. Kumanje silindile ukuze sithole imali yethu. Le mali eyebhizinisi lethu lesitolo, ngaphandle kwale mali liyafa ibhizinisi lethu,” kusho uNkk Dlamini.
Okhulumela amaphoyisa KwaZulu-Natal, uCaptain Nqobile Gwala, uthe bayaluphenya udaba.
“Amaphoyisa aseShowe ayiziphenya izinsolo zokulahleka kwemali. Sigqugquzela umndeni ukuba uxhumane namaphoyisa ngezikhathi zonke ngaleli cala,” kusho uCaptain Gwala.