Izinhlelo zesikhulu esisha sepaki iSimangaliso
SIZOSEBENZISANA nemiphakathi eyakhele iSimangaliso Wetland Park isikhulu esisha sale ndawo yezemvelo, uMnuz Sibusiso Bukhosini.
Phambilini iSimangaliso besiphethwe nguMnuz Andrew Zaloumis obesesiphathe iminyaka ewu-20 oshiye ngonyaka odlule.
Esitatimendeni esithunyelwe kwabezindaba izolo, uBukhosini uthe unohlelo lokuvikela imvelo kodwa kube kuthuthukiswa umnotho kufakwe zonke izinhlaka kuwo.
“Ngiyaliqonda iqhaza lemvelo ekuthuthukisweni komnotho kodwa lokhu akusho ukuthi kufanele ihlukunyezwe ngenxa yentuthuko. Kufanele ukukhula komnotho kuvulele wonke umuntu amathuba, imvelo kufanele ithuthukise umnotho nezokuvakasha. Sizosebenzisana nazo zonke izinhlaka ezithintekayo ukuqinisekisa ukuthi ipaki igqugquzela intuthuko,” kusho uBukhosini.
Uthe bazoqinisekisa ukuthi bahlonipha iqhaza likaNgqongqoshe wezeMvelo ongasekho uDkt Edna Molewa obefuna ukuthi ezemvelo zisetshenziselwe ukuthuthukisa umnotho nokuletha impilo engcono kubantu.
UBukhosini uzakhele udumo ethola imibiko emihle yomcwaningi mabhuku jikelele eseyiMenenja kaMasipala waseMkhanyakude naKwaMhlabuyalinyana.
Uneziqu zeMasters kwiEnvironment and Development: Protected Area Management nezinye iziqu.
Useke wasebenza ohlelweni lokubuyiswa kwezindawo zombuso ezivikelekile ngesikhathi esebenza kwaLand Affairs.
Uke waphatha kwezeMvelo KZN Wildlife iminyaka eyisishiyagalolunye.
Isitatimende seSimangaliso sithe amava kaBukhosini enza umfanele umsebenzi wokuphatha ipaki.