Kumele akhonjwe afika ngayo uBathabile Dlamini
NGESONTO eledlule iNkantolo yoMthethosisekelo inqume ukuthi uNksz Bathabile Dlamini akhokhe u-20% wezindleko zabameli ecaleni elithinta izibonelelo zikahulumeni oluhlanganisa ukuqokwa kwe-Cash Paymaster Services (CPS).
UNksz Dlamini osenguNgqongqoshe wezabesiFazane eHhovisi likaMengameli, wayengungqongqoshe wezokuThuthukiswa koMphakathi.
Inkantolo yanquma ngo-2014 ukuthi ukuqokwa kweCPS kwakungekho emthethweni futhi kungafanele. Le nkampani yayiqokwe ngo-2012.
UNksz Dlamini kuthiwe kufanele ayikhokhe le mali ngoba waba budedengu odabeni lwale nkontileka yeCPS nokwabeka engcupheni ukukhokhwa kwezibonelelo zikahulumeni.
UNksz Dlamini wazithethelela ngokuthi akumele le mali iphume kuye ngoba izinqumo wayezithatha njengongqongqoshe wezokuThuthukiswa koMphakathi kodwa iNkantolo yoMthethosisekelo ithole ukuthi wakhohlisa inkantolo yize wayefunge ukuthi uzokhuluma iqiniso.
Ukudidizela osekube khona futhi osekuhlukumeze abantu baseNingizimu Afrika abathembele ezibonelelweni, yinto eyenzeke ngenxa yezinqumo zikaNksz Dlamini.
Ubephazamisa ukuthi kushintshwe inkontileka isuswe ezandleni zeCPS iye ePosini. Uqhubekile uNksz Dlamini eMnyangweni wezokuThuthukiswa koMphakathi sekucacile ukuthi akasafanele ukuwuphatha ngoba ubevikelwa ngowayengumengameli Jacob Zuma.
Kwakungamele ukuthi uMengameli Cyril Ramaphosa amshenxisele komunye umnyango.
Abazi ipolitiki kangcono bathi uRamaphosa akakwazi ukulaxaza uNksz Dlamini ngoba lokho kungamdalela amazinyo abusheshelezi kwi-ANC Women’s League.
Kodwa-ke ayikho inkantolo enkulu edlula eyoMthethosisekelo, njengoba isikhulumile nje, uRamaphosa akakwazi ukuziba isinqumo sayo.
Kufanele uRamaphosa akhombise ukuba ngumengameli oqotho futhi aveze ukuthi wayeqinisile uma ethi uzokhuculula okonakele kuhulumeni. UNksz Dlamini kumele akhonjwe afika ngayo kuhulumeni, akukwazi ukuthi angaqhubeka abe ngungqongqoshe.