Sengikhokhe ngaqeda kodwa ibhange alifuni netayitela lami
EZABATHENGI
ALIPHELI isonto ngingatholanga ucingo kumuntu ikhala ngemali yakhe engaphumanga emsebenzini emuva kokuba ethathe umhlalaphansi noma kuwe inkampani ayisebenzelayo.
Ngesonto elidlule kufike owesilisa othe sekuphele iminyaka eyisishiyagalombili ezama ukuthola imali yakhe.
Uthe waxoshwa emsebenzini kodwa imali akakaze ayithole.
Ngimbuzile ukuthi waya yini eMnyangweni wabaSebenzi wathi akukho lapho engakaze aye khona. Uma ngicela ubufakazi bezindawo asezihambile nezizathu zokungasizakali kwakhe uvele wathi uyabona ukuthi nami ngigwazelwe yingakho ngilokhu ngimbuza izinto ezingenasidingo.
Ngiyazi abathengi abaningi baqashiwe emafemini njengami futhi njalo uma kuphela inyanga noma isonto umuntu uthola ipayslip enemininingwane yokuthi umqashi udonsa malini emholweni ayifaka kwi-Unemployment Insurance Fund nasesikhwameni sempesheni.
Ngiyacela nibhale phansi imininingwane yezikhwama zenu zempesheni futhi uma niye eMnyangweni wabaSebenzi nibuzisise ukuthi kungani ningasizakali.
Kulula ukusiza umuntu onemininingwane ephelele yesikhwama sakhe sempesheni.
Uma senithatha umhlalaphansi noma nidilizwa bhalani ama-email nibuze ukuthi izikhwama zenu zizoyidedela nini imali yenu. Lokhu kwenza kube lula ukuthi sinisize uma imali ingaphumi.
Asingene emibuzweni yaleli sonto:
Umbuzo: Ngashonelwa wumyeni ngonyaka odlule, enkampanini abeyisebenzela banginika imali encane bathi enye izonikwa abanye abantu akade ebondla. Inkinga angibazi labo bantu futhi nasemsebenzini abangitsheli ukuthi bawobani?
Impendulo: Kwakubi ukuthi inkampani ayifuni ukukutshela ukuthi wobani akade bondliwa wumyeni wakho kodwa kuyacaca ukuthi ubebabhale emabhukwini ezimali zasemsebenzini ngoba abanikazi benkampani abanawo amandla okucaza imali yomsebenzi. Ngicela uthinte ihhovisi lomxazululi wezindaba zezimpesheni okuyilona elinamandla okusho ukuthi kufanele nithole malini uma benondliwa ngumuntu ongasekho. Litholakala ngokuvakashela u-www.pfa. org.za noma ngokushayela u-012 346 1738.
Ngikufisela inhlanhla.
Umbuzo: Ngibone ubhale ngodaba lwebhange elinqaba netayitela lomuntu nami nginenkinga efanayo noStandard Bank. Sengikhokhe ngaqeda kodwa abafuni netayitela lami.
Impendulo: Ezabathengi zithinte abase Standard Bank bathi “Ikhasimende kufanele likhokhe imali elisikweleta yona bese lithola itayitela lalo”
Ngiyathemba bakuthintile ngoba abathandanga ukudalula okuningi bekhala ngokuthi kufanele bahloniphe ubudlelwano bebhange nekhasimende.
Umbuzo : Ngithenge ushizi ogulise izingane kwesinye isitolo. Uma ngibatshela abazange banginake. Impendulo : Uma uthenge ukudla okubolile esitolo kufanele ugcine isampuli yakho ngakuwe, uthathe izithombe zako ngaphambi kokuthi ukubuyisele esitolo. Ushuthe ngosuku olusho ukuthi kwenziwe nini futhi kuzobola nini. Ngiyacela abathenge ukudla okubolile ezitolo bathinte ihhovisi lezabathengi KwaZulu-Natal ku-0800 333 667.
Abakade bebhale ngezinkinga zamanye amabhange ngizobazisa izimpendulo ngokuzayo ngoba amabhange abo adinga ukunikwa isikhathi ngaphambi kokukhuluma nezintatheli.
Khonamanjalo ihhovisi lomxazululi wezinkinga sempesheni lingazise ukuthi abanganeme ngezinqumo zalo bayakwazi ukufaka izikhalo kwiFinancial Services Tribunal.
Kuqala abantu akade benganeme ngezinqumo zaleli hhovisi bebephoqeleka ukuthi baye eNkantolo eNkulu kungakadluli amasonto ayisithupha futhi lokhu bekuza nezindleko.
Umxazululi wezindaba zempesheni uNksz Muvhango Lukhaimane uthe uyajabula ukuthi abantu bazokwazi ukudlulisa izinqumo zakhe ngaphandle kokukhokha izizumbulu zemali.
Uthe izinqumo zakhe kufanele zidluliselwe kwiFinancial Services Tribunal kungakapheli izinsuku eziwu-30.
“Ngiyajabula ukuthi abantu bakithi ngeke bagugelwe yiphakethe uma bengagculisekile ngezinqumo zami. Lokhu kuzothuthukisa umsebenzi wethu wokuxazulula izinkinga zabathathe umhlalaphansi ngoba izinqumo seFinancial Services Tribunal kufanele silalelwe inamandla afanayo nawezinkantolo,” kusho uNksz Lukhaimane.
IFinancial Services Tribunal itholakala ku-012 428 8012/012 367 7259 nakwi-email LEG.Tribunal@fsca.co.za
Uma udinga usizo lwezabathengi ungathumela i-email kuboniswa.mohale@ inl.co.za