Akayingeni eyokwenzela ezikaMandlakazi ufefe
AMAZULU asanda kushaywa yiFifa ngoswazi olunzima ngenxa yokugoloza ukukhokhela umdlali waseNamibia uPhinheas Nambandi asazohlala emsileni we-log ye-Absa Premiership uma konke kuzohamba ngokwezifiso zomdlali weMaritzburg United uKeletso Makgalwa.
UMakgalwa ofike kwiTeam of Choice ekuqaleni kwesizini emuva kokubolekiswa yiMamelodi Sundowns, usongele leli qembu osekuyilona elibambe ibhuleki ngaphambi komdlalo wabakhaya okusasa ngo-7.30 ebusuku eKing Zwelithini Stadium, eMlazi.
Usuthu luya kulo mdlalo izinhliziyo zibomvu kwazise luphucwe amaphuzu ayisithupha kulandela udaba oluthinta ukungakhokhelwa komdlali waseNamibia. Ngaphezulu kokuphucwa la maphuzu osekwenze ezikaCavin Johnson zasala nelilodwa, iFifa iphinde yashaya leli qembu laseThekwini ephaketheni kwazise icela ku-R1 million imali okufanele liyikhokhe uma sekuhlangene nezinye izindleko. Ngokuthola kweSolezwe, AmaZulu abona umdlalo wabakhaya kuyiwona okufanele aqale ngawo abuyise la maphuzu ukuze ezonombela eqe iBlack Leopards okuyiyona ebisemsileni ngaphambi kokuphucwa koSuthu amaphuzu. Nakuba kunjalo kodwa uMakgalwa uthi iqembu lakhe libheke amaphuzu agcwele futhi alukho ufefe abazolwenzela ezikaMandlakazi. “Ngeke ngikhulume amanga umdlalo wabakhaya uhlukile kuneminye. Angingabazi ukuthi kuzoba umdlalo onzima ngenxa yokuthi kubhekene amaqembu angandawonye. Alikho iqembu elivuma kalula ukushaywa kule midlalo kodwa okumnandi ukuthi nathi siwafuna ngendlela efanayo amaphuzu kwazise asizange siqale kahle.
“Kusemqoka ukuthi sizibambe ziqine ngoba ngeke bavume ukuthi sibashayele esibayeni sabo kodwa nathi sinezethu izinhlelo nezifiso ngalo mdlalo yingakho ngingangabazi ukuthi uzobe ushubile,” usho kanje lo mdlali weTeam of Choice enamaphuzu amahlanu emidlalweni emihlanu.
Imidlalo ye-Absa Premiership kuleli sonto:
Kusasa ngo-7.30pm: Cape Town City v Bidvest Wits (Cape Town Stadium); AmaZulu v Maritzburg United (King Zwelithini Stadium); Polokwane City v SuperSport United (Old Peter Mokaba Stadium).
NgoLwesithathu ngo-7.30pm: Bloem Celtic v Mamelodi Sundowns (Dr Molemela Stadium); Black Leopards v Baroka (Thohoyandou); Orlando Pirates v Golden Arrows (Orlando Stadium); Chippa United v Free State Stars (Nelson Mandela Bay Stadium).