IBay ithumele umyalezo onzima ishaya i-Ajax
IRICHARDS Bay FC ithumele umyalezo oshubile emaqenjini asazovakashela eMhlathuze Sports Complex ngesikhathi ishaya i-Ajax Cape Town izolo ntambama emdlalweni weNational First Division (NFD).
IBay ikhombise zisuka ukuthi kusesibayeni sayo ngokuthi emizuzwini emihlanu umdlalo uqalile kube iyona ebuza imibuzo odongeni lwasemuva lweUrban Warriors.
UPaseka Sekese, oyibamba esiswini seBay, noMenzi Hlophe abebewuhlupho kwi-Urban Warriors yibona abakhahlelele unozinti we-Ajax, uBrandon Petersen, kodwa akuhambanga njengezifiso zabo bobabili beshaya phezu kwepali ngomzuzu wesibili nowesine.
Akukho okungako okwenzizwe ngabafana baseKapa esiwombeni sokuqala ngaphandle kokuthi bebephaselana kahle uma besuka emuva kodwa kuthi uma beke beqa maphakathi nenkundla uKhulekani Madondo, obedlala esiswini kwiBay, akuqede konke abebekuzama.
UMadondo ubemaka into engasukumi phansi futhi engasuki esiswini nobekwenza ukuthi abagadli be-Ajax babulawe yindlala phambili.
Ukusebenza kanzima kweBay kugcine kuyizuzisile njengoba kuthe ngomzuzu ka-32 isitobha sayo, uSandile Mthethwa, elibhajiswe ezintanjeni ngemuva kwe-free kick eshaywe uSekese.
Siphele isiwombe sokuqala ezikaMuhsin Ertugral zidonsa kanzima zilandela ngemuva ngo 1-0. Nabalandeli beBay bebekhombisa ngokusobala ukuthi kudandelwa esabo isiginci eMhlathuze Sports Complex, ngezinkulumo ezisakubhuqa ezivakashini.
Omunye wabalandeli uthe: “Kufanele kucace ukuthi sidlalela ekhaya phela. Kufanele bafike emakubo baxoxe ukuthi baficeni eBay”.
Ngesiwombe sesibili iBay iqhubeke lapho igcine khona. Ngemizuzu eyisikhombisa isiwombe sesibili siqalile uMadondo ushaye inguzunga yeshodi ephume phezu kwepali.
Izamile ukuhlanganisa i-Ajax mbijana kwathi ngomzuzu ka-17 esiwombeni sesibili umgadli we-Ajax, uGuy Stephane Bedi, washaya uqethu kwi-18 yeBay kodwa kwashoda amandla walibamba kalula uNgcobo.
Ibuye ngamandla iBay kwaba sengathi ithelwe ngezibonkolo. Umdlalo omuhle kaMichael Gumede, odlala phambili, ogobe ibhola elihle elihlangane noTshepo Mashigo obekufanele alibhajiswe ezintanjeni, wavele wageja, laphuma eceleni.
Izamile ukucindezela i-Ajax kodwa uMthethwa ubephika ibhadi emuva, njengoba ebenqoba lonke ibhola elisemoyeni. Kuhlule noma sekufakwa uSedwyn George ongumgadli we-Ajax, ongene endaweni kaBedi kodwa ufike enkundleni wangabonakala nhlobo. Imiphumela ye-NFD Cape Umoya United 1-0 Mbombela United; Royal Eagles 1-0 Uthongathi; Pretoria University 0-0 Maccabi FC; TS Sporting 1-0 Ubuntu Cape Town; Tshakhuma 0-0 Jomo Cosmos; Stellenbosch 2-0 Real Kings; TS Galaxy 2-0 Witbank Spurs; Richards Bay 1-0 Ajax Cape Town.