Uncome iPSL ngeMTN8 eMabhida
ENZE kahle impela iPremier Soccer League (PSL) yaletha umdlalo wamanqamu eThekwini”. Lokhu kushiwo umqeqeshi weCape Town City, uBenni McCarthy, ngemuva kokunqoba kwezakhe isicoco seMTN8 zishaya iSuperSport United ngo 4-1 sekukhahlelwa amaphenathi. Lo mdlalo obuseMoses Mabhida Stadium uphele ngo 0-0 kwangaba khona oshaya igoli nasesikhathini esengeziwe.
UMcCarthy ungene emabhukwini omlando enqoba isicoco sokuqala njengomqeqeshi, waphinde wanqobisa iCity isicoco sayo sesibili selokhu yasungulwa eminyakeni emithathu.
Lo mqeqeshi oke wadlalela iBafana Bafana amahlandla angu-31, uthi iPSL akufanele nakancane isolwe ngokuyisa umdlalo wamanqamu weMTN 8 eThekwini, nakuba kusuke omkhulu umsindo ngesikhathi kukhishwa isimemezelo emasontweni ambalwa edlule.
Bese kukhona nezinkulumo zokubhuqa ezithi, iPSL ayivele yenze iMoses Mabhida Stadium inkundla yokudlalela imidlalo yamanqamu kuleli, ngoba ezinye izinkundla zikhala ngaphansi. Bekukhona namanye amaziko ezindaba abekhala esifanayo, ebuza ukuthi kungani iTheku lihleze ligixabezwa ngemidlalo yamanqamu, ekubeni zikhona ezinye izinkundla ezingenza umsebenzi oncomekayo.
“Ngifisa ukuncoma iTheku, ngokuphuma ngobuningi balo. Ngijabule kakhulu ngokuthi iPSL nabaxhasi (okunguMTN) banikeze iTheku lo mdlalo wamanqamu. Uma nje ngingakhuluma iqiniso, angikhumbuli mina ngisengumdlali noma sengiwumqeqeshi ngidlala umdlalo eThekwini, inkundla ingagcwali. Ngisho nabezindaba baphuma ngobuningi babo. Ngiyasola kukhona impela okuthize la eThekwini okwenza abantu belithande ibhola. Hlawumbe kungenzeka ukube woshisa nyama kodwa ngijabule ngeTheku futhi angikhali ngalutho,” usho kanje uMcCarthy obumbona ngisho ebusweni ukuthi ulizwa ngaphakathi iTheku labantu.
Ziye kulo mdlalo, abaqeqeshi bobabili uKaitano Tembo opheka Amatsatsantsa A Pitori, noMcCarthy befuna ukubeka umdlalo wokunqoba lesi sicoco bengabadlali, bephinde basinqobe sebengabaqeqeshi. UTembo unqobe lesi sicoco ngo-2004 sisabizwa nge-SAA Supa 8, kanti uMcCarthy usidle ngo-2011 esagijima kwi-Orlando Pirates. UMcCarthy uthe uyazwelana kakhulu noTembo.
“Okumenzile nami kwangenza ngesizini edlule sehlulwa kowamanqamu. Uzodlula esimeni esangenza ngesizini edlule, ukuphoxeka usuzitshela ukuthi uzobeka umlando. Nginesiqiniseko sokuthi uzobuya ngamandla ngoba unabadlali abafuna ukumdlalela. Angikusho lokhu ngoba nakhu senginqobe isicoco sami sokuqala. Kuzofanele azibukisise, alungise
amaphutha, nakanjani